CEBU, Philippines — Giawhag ni Julius Chua, Provincial Employment Service Office (PESO) Capitol Labor and Employment Officer III ang mga tawo nga walay trabaho sa pagsalmot sa ilang ipahigayon nga Labor Day Job Fair karong umaabot nga Mayo 1, adlaw nga Martes diha sa social hall sa Capitol building.
Sigun ni Chua nga pweding mosalmot bisan kinsa nga walay trabaho ug magparehistro dayon kini diha sa buhatan sa PESO sa Kapitolyo.
Ang mga rekisitos nga gikinahanglan gilangkuban kini sa resume, transcript of record (TOR) sa college ug diploma sa high school, 2x2 pictures colored o black and white ug employment certificate gikan sa unang gitrabahoan kong nakatrabaho na kini. Ang registration nagsugod niadtong Marso 5, 2018 hangtud sa Mayo 1 sa adlaw sa nahisgutang kalihukan.
Nunot niini, gibutyag ni Chua ang mga schedule sa job fair sa Kapitolyo diin niadtong Marso 17 ug 18, 2018 gipahigayon ang overseas job fair, Abril 30 ug May 1, 2018 local job fair, Hulyo 7 ug 8, 2018 overseas job fair, Agosto 25 ug 26, 2018 local job fair, Oktubre 13 ug 14, 2018 overseas job fair ug Nobiyember 17 ug 18 local job fair.
Gawas niini, niadtong Abril 2, 2018 gisugdan na usab ang pagpanawat sa mga aplikante alang sa summer job karong tuiga. Ang pagpanawat og aplikante hangtud kini sa Abril 16, 2018
Ang Special Program for the Employment of Students (SPES) usa ka programa sa Department of Labor and Employment (DOLE) diin mahatagan og prebilihiyo ang mga estudyante nga nigradwar isip valedictorian o salutatorian sa mga nagkalain-laing lungsod sa Sugbo nga makaapil sa summer job.
Ang 60 porsyento sa ilang suholan gikan kini sa panudlanan sa probinsiya ug ang 40 porsyento maggikan sa DOLE.
Ang mga rekisitos sa mo-apply og summer job gilangkuban sa birth certificate o baptismal certificate, income tax sa ginikanan nga dili molapas ngadto sa P131, 484.00 ang tuig, school certificate o grado nga walay hagbong.
Kong walay trabaho ang ginikanan kinahanglan mokuha ug BIR exemption uban sa cedula ug barangay certificate of indigent.
Matag tuig sa buwan sa Enero magsugod na og panawat ang PESO sa mga estudyante nga interesado mag-summer job ug pangitaon lang nila si Chua. (Myca Mae Gabato, CNU Intern/BDB) (BANAT NEWS)