CEBU, Philippines — Patay ang usa ka 79-anyos human giatsa diha sa sulod sa iyang panimalay didto sa Sitio Palaypay, barangay Lipanto, Alegria niadtong Lunes sa udto.
Ang biktima giila sa Alegria Police Station nga si Fotunata Yguinto, usa ka mag-uuma ug residente sa maong bukirang barangay.
Sigun pa sa imbestigador nga si SPO3 Edward Villarte napalgan sa apo niini nga si Ronald Yguinto ang apohan nga nagkadugo ang agtang ug nagpakitabang sulod sa panimalay niini. Ang maong apo naagi sa lugar kay nagtugway sa iyang kabayo.
Dali nga gidala sa Reinhard Wirtgen Memorial Hospital ang biktima apan pag alas 3:50 sa hapon niana, namatay kini.
Tug-an pa sa imbestigador nga ang doktor nga mitan-aw sa biktima nagtuo nga giatsa ang agtang sa biktima. Sa pagsubay sa kapolisan sa crime scene adunay atsa nga napalgan sa lugar.
Sa inisyal nga imbestigasyon ni Villarte, iyang gitug-an sa Banat News nga usa sa ilang gitan-aw nga anggulo nga kwarta ang tumong sa suspetsado sanglit matod pa nga gitug-an sa bana sa biktima nga nawagtang na ang kwarta niini sa pitaka apan wala kini mitug-an kon pila.
Ang bana sa namatay may gitug-an nga pangalan nga ilaha rang silingan ug dugay na nilang nakabikil.
“Ang bana nilakaw kuno na sa ilang balay pag-alas onse sa udto kay aron moadto sa lungsod unya paggawas kuno niya nakit-an to niya ang kadtong tawhana nga nagbarog-barog kuno sa atbang,” si Villarte miingon. Apan gisusi usab karon sa kapolisan ang impormasyon nga nag-away ang magtiayon sa wala pa molakaw ang bana. (IBM) (BANAT NEWS)