Mga minor gipamusil

CEBU, Philippines — Patay ang usa ka 14- anyos nga batang babaye human mabiktima sa pagpamusil sa laing grupo sa  mga minor de edad diha sa luyong bahin sa usa ka mall sa Sitio Liong, Barangay Alang-alang sa dakbayan sa Mandaue alas-3  pasado ang takna sa miaging kaadlawon.

Si Police Chief  Inspector  Mercy Villaro, Public Information Officer  (PIO) sa Mandaue City Police Office (MCPO) miingon nga ang 14-anyos naigo sa iyang ulo samtang naigo usab ubang bahin sa lawas ang kauban niining 17-anyos nga lalaki.

Si  Police Officer 3  David Omambac sa Presinto 1 sa MCPO nga nahinabi sa Banat News miingon nga nagtapok nang daan ang grupo sa mga biktima kauban sa grupo sa mga batan-ong lalaki sa maong dapit.

Nag-iyahay og panagan ang mga batan-on dihang kalit nga nagbuto-buto ug nangalup-og ang mga nangasamdan.

Human sa pagpamusil dali usab nga misibat pahilayo sa maong lugar ang grupo nga namusil  ug wala na kini maabti sa mga polis nga mitubag sa maong alarma.

Ang duha ka mga naigo sa maong pagpamusil daling gidala ngadto sa Vicente  Sotto  Memorial  Medical   Center   sa Dakbayan  sa Sugbo apan gideklarar nga patay ang babaye.

Naghimo pa sila og dugang imbestigasyon pag-ila sa grupo sa mga namusil. Gisusi pa kon panagribal ba kini sa mga gangs sa mga minor de edad.

Si Mayor Luigi Quisumbing higpit na nga nagdili sa mga convenience stores ug mga tindahan nga mobaligya og ilimnong makahubog ngadto sa mga batan-on panahon sa kagabhion.

Gipasidan-an ni Quisumbing nga iyang pasirhan kadtong mga tindahan nga madakpan nga nagbaligya og ilimnong makahubog sa mga batan-on.

Ang Mandaue City adunay curfew ordinance sukad pa sa tuig 2016. (BANAT NEWS)