Bohol wala’y hulga sa terorista

CEBU, Philippines — Ang probinsiya sa Bohol nagpabiling luwas batok sa mga teroristang grupo matud sa tigpamaba sa Police Regional Office (PRO)-7 Superintendent Reyman Tolentin.

Gibutyag ni Tolentin nga wala sila’y nadawat nga intelligence report kabahin sa hulga sa mga terorista ug uban pa sa Bohol.

Karong umaabot Abril 11 ang unang anibersaryo sa pag-abot sa mga teroristang grupo nga Abu Sayyaf ngadto sa Inabanga, Bohol.

Kahinumduman nga duha ka adlaw lang human miluwat og travel advisory ang embahada sa Estados Unidos kabahin sa posibleng pagpanagit sa usa ka teroristang grupo didto sa Bohol ug ubang parti sa Central Visayas miabot ang 11 ka miyembro sa Abu Sayyaf sakay sa tulo ka pump boat didto sa Barangay Napo, lungsod sa Inabanga, Bohol.

Ang lider sa maong grupo mao si Maumar Askali alias “Abu Rami” kinsa namatay atol sa unang engkwentro tali sa tropa sa gobiyerno.

Lakip sa nakalas sila si Second Lieutenant Estelito Saldua Jr., Corporal Meljun Cabajan, Sergeant John Dexter Duero ug Special Weapons and Tactics (SWAT) member nga si Rey Anthony Nazareno.

Gideklarar sa military niadtong Mayo 15, 2017 nga ‘cleared’ na ang maong lugar batok sa maong mga terorista. (BANAT NEWS)