Grupo motutok paglimpyo sa mga kanal giporma

CEBU, Philippines — Nagporma ang Cebu City Government og “Menos Baha Task Force” nga ang tumong mao ang pagtutok sa pagpanglimpyo sa mga kanal, sapa, ug suba  sa dakbayan aron mapugngan ang pagbaha. Si Mayor Tomas Osmeña miaprubar sa project proposal ni Konsehal Jerry Guardo, chairman on infrastructure base sa tinguha sa Cebu City Disaster Risk Reduction Management Office human nila nakita nga kinahanglan gyud nga adunay grupo nga motutok sa regular nga paglimpyo sa mga agianan sa tubig sa siyudad.

Ang Menos Baha task force pangulohan sa Department of Engineering and Public Works gitahasan nga pugngan ang pag-awas sa baha panahon sa ting-ulan.

Ilang limpyohan, ayuhon, palawman ang mga kanal, manholes, sapa, ug suba ug tudloan  ang publiko sa hustong paglabay sa basura. Ang mga dapit nga tutokan unya sa task force mao ang barangays Santo Niño, Kalubihan, Pahina Central, Parian, Tinago, Tejero, T. Padilla, Kamagayan, Sta. Cruz, Day-as, Sambag I, Sambag II, Ermita, Mabolo, ug uban pa. Si Guardo nagkanayon nga nigahin ang siyudad og P15 milyones alang sa maong program para niining tuiga. Kini gibutang diha sa CCDRRMO account.

Gimando usab sa mayor ang pagbutang og rubbish traps o salaan sa mga basura diha sa mga kanal ilabi na kadtong mga lupa nga lugar aron sayon ra ang paglimpyo niini.

“We are now implementing the rubbish trap because previously we’ve noticed nga one of the causes sa flooding ang atong drainage wala’y rubbish trap. Ang garbage modiretso sa culvert which is very difficult for us pag-decongest,” matud niya. (BANAT NEWS)