Anti-terror, anti-kidnapping exercise gihimo sa Oslob
CEBU, Philippines — Para sa pagpangandam sa posibilidad nga pag-atake sa mga teroristang bandido, ang Armed Forces of the Philippines (AFP), PNP, coast guard kauban ang mga stakeholders nagpahigayon og pagbansay-bansay didto sa kadagatan sa Oslob.
Ang maong pagbansay-bansay naglangkob og tulo ka mga senaryo diin unang gipakita kung unsaon sa pag- neutralize sa mga operatiba sa Philippine Coast guard ang grupo sa mga Abu Sayyaf nga buot nga mo-kidnap og grupo sa lokal nga mga turista sa usa ka beach resort sa Oslob.
Sa ikaduhang senaryo gihimo usab sa pagresponde sa Philippine Navy ug coast guard kauban ang mga Bantay Dagat human nila mabantayi ang duha ka mga banka nga nagkarga og mga armadong tawo.
Ug sa ikatulong senaryo, didto makita kung unsaon pagresponde sa mga operatiba sa gibutang nga bomba sa mga terorista duol sa baybayon ug ang paspas nga pagresponde sa mga local nga polis, Bureau of Fire Protection (BFP) ug ang medical team.
Ang pangulo sa Armed Forces of the Philippines (AFP)-Central Command (CentCom) nga si Lt. Gen. Paul Atal miingon nga dili lang insurgency ang ilang gitutokan karon apil na usab ang terorismo subay sa nahitabo sa Marawi.
“And it is near Mindanao, so we are preparing always for the worst case scenario because this is near in Mindanao. And Mindanao right now is they have the Martial law, I specifically give instructions to my commanders not only to focus on insurgency problem but also in terrorism,” matud pa ni Atal.
Si Atal midugang nga atol sa pagbansay-bansay andam ang Central Visayas sa bisa’g unsa mang hulga sa terorismo.
Apil usab sa gipahigayong pagbansay-bansay ang pag-abli sa bag-ong programa sa Philippine Navy nga mao ang Naval task Group ‘Sea Dog’ nga gilangkoban sa mga Naval Reservists nga taga Oslob nga maoy motabang sa pagresponde kung adunay mga hulga sa terorismo sa lungsod.
Sa laing bahin, dako ang pasalamat sa usa ka Slovak National nga si Lucia Skvareninova usa sa mga turista sa Oslob nga nakasaksi sa maong simulation exercise.
Matod pa niya nga makapadugang kini og pagsalig kanilang mga turista sa ilang seguridad samtang sila nagbakasyon dinhi. (IBM) (BANAT NEWS)
- Latest
