Paggamit og dinamita sa pagpanagat padayon
CEBU, Philippines — Mokabat 850 ka kilos nga gituohang mga pinabuthan nga isda ang nasakmit sa mga tinugyanan sa Cebu City Bantay Dagat Commission alas -10 sa gabii adlaw nga Miyerkules sa may Pasil Fish Port.
Ang maong mga isda, gikan sa Zamboanga City gisakay sa Isuzu Bongo nga gimaneho ni Aljamar Husin Rosales nga giagi pa gikan sa Dipolog City ug ginaug sa Dumaguete City una gidala diha sa Pasil Fish Port, apan wala pa mailhi kon kinsa ang tag-iya niini.
Ang mga isda naglangkob sa tangigue, mulmol , mamsa, ug klase-klase nga isda.
Matud pa ni Michael Guerra, Program Director sa Cebu City Bantay Dagat Commission, kasagaran drayber maoy ilang madakpan nga wala’y papeles. Kasagaran sa mga tag-iya dili dayon mopatim-aw ilabi na kung mga binuthan ang mga isda hinungdan kasagaran ila mapasakaan og kaso sulod sa tulo ka higayon mao ang driver.
Gitug-an ni Guerra, P170 mil ang kinatibuk-an nga kantidad sa nasakmit nga isda. Ilaha kining iapud-apod sa mga charitable institutions samtang maayo pa ug mapahimuslan.
Ang maong buhatan hugot nga nagbantay sa mga fish ports sa Sugbo aron dili makalusot ang mga pinabuthan nga isda sa gitawag nga ‘market denial’ nga estratehiya.
Giawhag nila ang mga fish dealers nga dili mamalit og pinabuthan nga isda tungod kay ang dagat maoy maguba niini. Labaw sa tanan, way mogamit og dinamita kon dili nila mabaligya ang isdang makuha gikan niini. (IBM) (BANAT NEWS)
- Latest
