Laing developer nagtinguha sa CICC

CEBU, Philippines — Nakadawat na sab ang kagamhanan sa Dakbayan sa Mandaue og unsolicited proposal nga adunay buot mo-develop sa kanhi Cebu International Convention Center.

Matud ni Atty. Elaine Bathan, chief of staff sa Mandaue City Hall, nga gitagalan nila hangtud sa Abril 24 kadtong buot mo-challenge niini.

Niadtong Enero nahatag na sa kagamhanan sa dakbayan ang ilang una ug ikaduhang bayad ngadto sa Kapitolyo ug gikatakda nga Hunyo ang katapusan nga bayad nga P100 million.

Giklaro ni Bathan nga dili pasagdan ang pipila ka biktima sa sunog sa Mantuyong ug Guizo nga nagpabiling nagtulda-tulda sa CICC compound.

Gipaningkamutan sab karon sa dili pa maabot ang Hunyo o sa dili pa ma-award sa hingpit ngadto sa developer, makabalhin na sa mga relocation sites ang mga nasunugan nga posibleng sa Barangay Casili ug ang uban ang mobalik sa 9.2 ektaryang luna sa Barangay Mantuyong.

Kung mapalambo na ang CICC mas hatagan og prayoridad nga makatrabaho niini ang mga biktima sa sunog. (GMR) (BANAT NEWS)