32nd LWYD malampusong gitak-upan

CEBU, Philippines — Malampuson nga gitak-upan kagahapon sa buntag ang ika-32 nga Local World Youth Day nga gipangulohan ni Cebu Jose Palma pinaagi sa Santos nga Misa subay usab sa kalihukan sa Bendita sa Lukay timaan sa pagbukas sa Semana Santa.

Matud sa arsobispo atubangan sa kapin 3,000 ka kabatan-onan nga ang mga batan-on maoy bugtong makatabang sa iyang isig ka batan-on.

“The best people to help the youth are the youth,” sumala pa ni Palma.

Gipanghimug-atan ni Palma ngadto sa kabatan-onan nga bisan sa ilang mga sala nga naangkon dili magpakawala sa paglaum tungod kay ang Ginoo daku kaayo og gugma ngadto kanila.

Awhag ni Palma nga padayon sa pagpangalagad ug pagserbisyo diha sa ilang tagsa-tagsa ka parokya.

Unang gipahigayon ang praise and worship songs sa wala pa nagsugod ang misa.

Ang kabatan-onan nagagikan sa nagkadaiyang distrito sa Sugbo nga sakop sa Archdiocese of Cebu.

Human sa Santos nga Misa gisunod ang turn-over sa Cross and Icon gikan sa mga batan-on sa Balamban ngadto na sa Commission on Youth nga mao na sab ang host alang sa National Youth Day nga ipahigayon sa Abril sunod tuig sa Dakbayan sa Sugbo.

Sumala pa ni Palma nga nagsugod na sila karon sa pagpangandam alang sa NYD diin aduna nay mga tigum ug coordination ang gipahigayon.

Samtang si Fr. Mark Barneso, chairman sa Commission on Youth, mapasalamaton sa kalampusan sa Local World Youth Day ug sa pagkakaron nangandam na sab sila alang sa NYD2019 subay usab kini sa tuig alang sa mga batan-on.

Gitug-an ni Barneso nga nanginahanglan sila karon og usa ka libo ka batan-on nga volunteer aron motabang sa mga kalihukan sa NYD ug bukas ang ilang buhatan sa Commission on Youth.

Gipaabot nga 15,000 ka batan-on gikan sa nagkadaiyang bahin sa nasud ang motambong sa maong nasudnon nga kalihukan sa kabatan-onan. (BANAT NEWS)