Pagpatay sa konsehal gikondenar sa PB
CEBU, Philippines — Gikondenar sa Provincial Board ang pagpatay sa konsehal sa Lungsod sa San Fernando nga si Alexander Alicaway.
Atol sa out-of-town session sa PB sa Balamban kagahapon gipalabang og resolusyon nga nagpadayag og simpatiya ug pagkondenar sa kamatayon ni Alicaway.
Ang maong resolusyon gipangamahanan ni Bokal Yolanda Daan ug Raul Bacaltos sa primero distrito diin nahisakop ang San Fernando.
Ang pangulo sa Philippine Councilors League (PCL) Cebu Chapter ug ex-officio PB Member Earl Tidy Oyas sa Lungsod sa Catmon nibutyag nga mopalabang sab ang PCL Board og resolusyon sa pagkondenar sa kamatayon ni Alicaway.
Si Oyas nihulagway sa konsehal nga buotan ug sa iyang nasayran wala kini kaaway ug wala sa lista sa nalambigit nga ilegal nga drugas.
Si Alicaway gipatay sa wala pa mailhing mamumuno sa Barangay Poblacion, San Fernando samtang padulong sa buhatan sa Sangguniang Bayan.
Si Gobernador Hilario Davide III atol sa iyang pagbisita sa haya ni Alicaway nisaad nga mohatag ang Kapitolyo og financial assistance sa pamilya sa konsehal. (BANAT NEWS)
- Latest
