Tulo ka pusher sikop, 600 surrenderees gi-monitor

CEBU, Philippines — Tulo ka tawo sikop sa drug operation sa kapolisan sa milabay’ng adlaw diha sa Barangay Tugbongan, lungsod sa Consolacion ug Barangay Santa Rosa, Isla sa Olango, dakbayan sa Lapu-Lapu.

Sa lungsod sa Consolacion, ang suspetsado mao si Linsey Barbida, 34-anyos, taga  Barangay Poblacion, lungsod sa Liloan ang naimbargohan og 11 ka gagmay’ng pakete sa shabu nga mokantidad tanan ngadto sa P5,192.

Samtang sa Isla sa  Olango ang mga suspetsado mao ang managsuong  Ramil ug Marivic Maranga, hingkod ang mga panuigon ug mga residente usab sa maong dapit ang naimbargohan og lima ka gagmay’ng pakete nga shabu.

Sa laing bahin, Si Police Chief Inspector Miguel Andesa, hepe sa presinto 1  nga nagbase sa Isla sa Olango sa dakbayan sa Lapu-Lapu mibutyag nga higpit nila nga gi-monitor ang 600 ka nalambigit sa paggamit ug pagpamaligya og shabu kinsa mitahan sa Oplan Tokhang nga ilang gipahigayon sa miaging tuig. Ang maong mga surrenderee gipaubos sa rehabilitation program sa pribadong sektor nga gisuportahan sa kapolisan. (FREEMAN)