CEBU, Philippines — Gipahigayon kagahapon sa buntag sa Cebu Provincial Anti-Drug Abuse Office ang surprise drug test sa mga station chiefs, staff ug kapolisan nga ubos sa Provincial Personnel Holding Administration Unit sa Cebu Provincial Police Office.
Atol sa command conference gipahigayon ang surprise drug test sa 47 ka hepe, walo ka staff ug 32 ka polis nga anaa sa PPHAU.
“Surprise ‘to. Tinawag ko lang na command conference lang pero di nila alam na before pala ng conference ay may drug test,” matud ni CPPO Director, Senior Supt. Edgar Alan Okubo, kinsa lakip sa nipaubos sa drug test.
Ang drug test kabahin sa internal cleansing sa kapolisan aron magpabilin ug magpadayon ang pagserbisyo sa katawhan nga limpyo ug wala malakip sa mga ilegal nga kalihukan.
Pipila ka adlaw gikan karon ipagawas sa CPADAO ang resulta sa drug test ug ang CPPO mosilot gyud sa polis nga magpositibo sa drug test.
Si Okubo nipasidaan sa kapolisan sa Probinsiya sa Sugbo nga magpabilin sa ilang gipanumpaan nga moserbisyo sa katawhan ug dili moapil sa mga ilegal nga kalihukan sama sa ilegal nga drugas.
Una na nga gipahigayon ang drug test sa kapolisan sa Lungsod sa Argao ug Dakbayan sa Naga diin usa ka Non-Uniformed Personnel sa Argao ang nagpositibo apan ipaubos pa sa confirmatory test.
“It’s the higher headquarters to initiate actions,” matud ni Okubo. (BANAT NEWS)