CEBU, Philippines — Aduna nay bugas sa National Food Authority nga mangabot gikan sa gawas sa nasud karong Hunyo.
Kini ang pamahayag ni NFA-7 information officer Olma Bayno human nagkaanam og kaubos ang inventory sa NFA rice tibuok nasud.
“Mao ni ang among nadawat gikan sa maong central office kay gi-aprubahan na man ang rice importation. Pero mao lagi gibana-bana nga moabot inig June pa,” matud ni Bayno.
Nagkanayon si Bayno nga tayming sab kay sa Hunyo magsugod na ang lean months nga nagpasabot nga gamay ra og ani ang mga mag-uuma.
Niadtong Pebrero 14, aduna na lay 133,000 ka sakong bugas sa Central Visayas og kuhaan pa kini og 2,500 ka sako alang sa Provincial Social Welfare and Development Office ug ang 15,000 ka sako ipadala sa NFA Region 8.
Apan giklaro ni Bayno nga nagkuwang lang ang NFA rice apan nagpabilin nga stable ang supply kay daghan man ang commercial rice. (BANAT NEWS)