CEBU, Philippines — Paeskwelahon ug hatagan og panginabuhian ang mga indigenous people (IP) sama sa mga Badjao nga nagsuroy-suroy lang sa kadalanan sa pagpangayo og kwarta ug makaon.
Kini ang tumong sa paglusad sa National Integration Scholarship Program sa Technical Education and Skills Development Authority sa Dakbayan sa Sugbo kagahapon nga gitambungan ni Secretary Guiling “Gene” Mamondiong.
Matud ni Mamondiong nga buot si Presidente Rodrigo Duterte nga maatiman ang problema sa mga kabus nga mga IPs nga dugay na nga napasagdan sa kagamhanan.
Ubos sa maong programa, ang TESDA mohatag og libreng technical-vocational training sa mga IPs ug hatagan pa gyud og transportation ug food allowance aron madasig sa pagtuon sa training center sa komunidad. Ang ahensiya adunay P6.9 bilyones nga pundo ug dugangan pa gyud kini og laing P9 bilyones alang sa maong programa.
Giklaro sab ni Mamondiong nga dili lang kutob sa paghuman sa training ang ilang himoon kun dili ang pagpahimutang nga makatrabaho ug i-monitor sab ang ilang kahimtang aron pagseguro nga magamit ang ilang makat-onan.
Nanawagan si Mamondiong sa mga IPs lukop nasud nga moduol sa ilang buhatan aron mahaw-as sila sa kakabus.
“Ito na po ang panahon na dapat sila makinabang,” matud ni Mamondiong.
Si Darrel Honorario sa National Commission on Indigenous People (NCIP) nibutyag nga adunay 16 milyones ka IPs lukop nasud nga adunay 110 ka sinultihan.
Dugang ni Mamondiong nga ang mga Badjao nga naglaroy-laroy lang ang hatagan sab og mga pinuy-anan aron dili na bisan asa lang sila mamuyo ug mangatulog.
Iyang giawhag ang NCIP sa paghimo usab og lakang sa problema sa mga Badjao ug aron maagni kini sa pagtuon ubos sa gitanyag nga scholarship program sa TESDA. (BANAT NEWS)