CEBU, Philippines — Niduso na sab og mosyon aron siya mahimong state witness ang kanhi uyab sa gipatay nga si Staff Sergeant Mark Herbert Oberes.
Si Resamie Cabañog, usa sa mga suspek sa pagpatay ni Oberes, ang natanggong sa bilanggoan kuyog sa iyang kasamtangang uyab nga apil sa mga suspek nga si Engr. Joshua Garciano.
Si Garciano ang una nang niduso og mosyon nga unta siya himuong state witness sa pagpatay ni Oberes tungod kay wala gyud siya nahibawo sa planong pagpatay ni Oberes.
Laing suspek mao ang inahan ni Resamie nga si Edna Cabañog nga maoy nikuha ni Tommy Isugan ug sa duha ka lalaki nga wala pa ilhi.
Samtang kaso nga arson ang gipasaka sab batok sa unom ka suspek sa Dakbayan sa Carcar human nakakuha sila og tulo ka testigos sa pagbubo sa gasolina sa sakyanan ni Oberes ug sa lawas niini.
Ang arson nga kaso lahi sa kasong murder nga giatubang sa unom.
Gipatay si Oberes sa Isla Verde, Corazon Village 2, San Isidro, Dakbayan sa Talisay.
Human sa komosyon gidala si Oberes sa Siyudad sa Carcar diin didto gisunog ang puti nga sakyanan niini lakip ang iyang lawas.
Asoy pa ni Supt. Marlu Conag, hepe sa kapolisan sa Siyudad sa Talisay, nga mosamot sa pagpalig-on sa ilang kaso ang giduso sa kapolisan sa Carcar diin ang ilang testigos nakakita gyud sa pagbubo sa gasolina sa sakyanan ni Oberes.
Si Resamie ug si Garciano ang nasikop apan ang inahan ni Resamie ang hanap na nga motahan pa sa iyang kaugalingon nga kasamtangan karon nga nikuyog nila ni Isugan ug sa duha nga wala pa ilhi.
Ang duha nga nasikop ang niduso og mosyon nga sila himuon nga state witness sa kaso tungod kay wala man gyud sila'y labot sa plano sa pagpatay ni Oberes. (BANAT NEWS)