CEBU, Philippines — Gipasalig ni Police Regional Office-7 Director, Chief Supt. Robert Quenery, nga masilutan gyud si PO3 Roelito Tano, ang polis kinsa namusil sa lalaki nga gikatahong nanguyab sa iyang 83-anyos nga inahan.
Gawas sa kasong kriminal, mag-atubang sab og kasong administratiba ang polis.
Samtang ang director sa Cebu Provincial Police Office, si Senior Supt. Edgar Alan Okubo, nipahinumdum sa iyang mga polis nga dili magpadala sa emosyon ilabi na nga sila maoy gisaligan sa gobiyerno nga magdala og armas.
Si Tano ubos sa Provincial Mobile Force Company (PMFC) sa Lutopan Detachment, Dakbayan sa Toledo ug namusil sa usa ka Fabian Libaton, residente sa Barangay Kanyuko sa maong dakbayan.
Nagsakay si Tano sa traysikad ni Libaton paingon sa barangay hall aron magpahusay sa kapitan aron ipaundang na ang pagpanguyab ni Libaton sa 83-anyos nga inahan. (BANAT NEWS)