Negosyante og karne gipusil patay
CEBU, Philippines — Patay ang usa ka negosyante og karne human gipusil sa wala ilhing mamumuno sa barangay Poblacion lungsod sa Pinamungajan kagahapon sa hapon. Giila ang namatay nga si Renato Gepitulan, 65, taga barangay Pandacan sa maong lungsod.
Matud ni Police Officer 1 Adrian Mabida sa Pinamungajan Police Station naglingkod ang biktima sa iyang tindahan sulod sa Pinamungajan Public Market sa dihang giduol kini sa wala mailhing lalaki ug mipusil kaniya usa ka higayon.
Dali nga nibiya ang wala ilhi mamumuno nga nagsul-ob og sweat shirt nga itom ug misakay sa nagpaabot nga motorsiklo ug misutoy padung sa bukirong bahin sa maong lungsod.
Gidala sa Pinamungajan District Hospital ang biktima apan gideklarar kini nga patay na. Matud ni Dr. Feleus Bascon ang attending physician nga nakaangkon og samad pinusilan sa tampihak ang biktima hinungdan sa iyang kamatayon.
Nakuha usab sa kapulisan ang basiyo sa bala sa .45 nga kalibre sa armas samtang padayon pa ang imbestigasyon sa motibo sa maong krimen. (BANAT NEWS)
- Latest
