Mayor Osmeña mipahimangno batok party drugs
Sigon sa mayor nga usa kini sa rason nganong wala tugoti sa siyudad ang permits sa ubang mga concerts ug kalihukan subay na sa Sinulog sama niining Lifedance ug uban pa. .Paul Jun E. Rosaroso/File
CEBU, Philippines — Si Cebu City Mayor Tomas Osmeña mipahimangno niadtong mga motambong sa mga parties ug kalingawan atol sa Sinulog nga dili gyud magkompiyansa og dawat-dawat og ilimnong makahubog nga itunol kanila kay basin gisagolan kini og party drugs.
Sigon sa mayor nga usa kini sa rason nganong wala tugoti sa siyudad ang permits sa ubang mga concerts ug kalihukan subay na sa Sinulog sama niining Lifedance ug uban pa.
Apan gitataw niini ang nag-unang rason gyud sa wala pagtugot mao ang traffic nga posibleng mamugna diha sa South Road Properties tungod kay kadaghanan sa mga sakyanan anha na moagi tungod sa konstraksiyon sa underpass project nga gihimo sa Natalio Bacalso Avenue ug F. Llamas Street.
“Even though naa sila’y designated parking areas, they are not in a position to tell cars don’t park here,” matud sa mayor.
Nabalaka siya nga mahasol unya ang mga tawong gikan sa Sinulog ug mamauli na sa probinsya anha agi sa SRP.
Si Konsehal Dave Tumulak, Executive Committee Chairman sa Sinulog 2018 miingon bisan pa man og makasinati og pag-uwan ang Sinulog Grand Parade wala’y mahitabong kausaban sa ilang preparasyon ug magpadayon gyud kini.
Ang misa sa Sinulog Grand Parade magsugod og alas 7 sa buntag ug human sa santos nga misa sugdan dayon ang Sinulog Street Dancing. (BANAT NEWS)
- Latest
