Walay gun ban

CEBU, Philippines — Gipahibalo ni Police Regional Office 7 Regional Director Chief Supt. Jose Mario Espino nga walay gun ban nga ipatuman panahon sa kasaulogan sa Sinulog ug Pista sa Senyor Sto. Niño  sukwahi sa mga niaging kasaulogan niini. Wala pa say desisyon kon pawngon ang cell sites sa maong adlaw.

"Based on last year activities, no reported incidents na making use of firearms. The security will focus on the orderliness ng kapaligiran," si Espino miingon.

Iyang gitataw nga hugot ang seguridad nga ipatuman sa maong kasaulogan sanglit ang Major Event Security framework maoy sundan sa plano sa seguridad sa tanang aktibidad may labot sa Sinulog 2018.

Mao kini ang sagad gamiton sa PNP kon adunay mga dagkong kalihokan sama sa Association of Southeast Asian Nations ug International Eucharistic Congress niadtong tuig 2016.

Samtang mag-agad ang kapolisan base sa impormasyong mahipos kon may hulga ba sa seguridad ayha pa sila modesisyon kon pawngon ang mga cellsites sa siyudad.

Magsugod karong adlawa ang unang misa nobenaryo sa kapistahan ni Senyor Santo Niño didto sa Basilica Minore Del Santo Niño samtang karon petsa 20 na ang Sinulog 2018.

Ang hepe sa Abellana Police Station nga si Chief Insp. Maria Theresa Macatangay nakig-alayon sa mga tagdumala sa mga hotel, pension house ug mga malls sulod sa ilang hurisdiksyon bahin sa pagpahugot sa seguridad tungod sa pagdagsa sa mga turista ug mga deboto. (BANAT NEWS)