CEBU, Philippines — Ang kabahin sa prutas nga “cacao” maoy tema sa presentasyon karon sa Sinulog contingent sa dakbayan sa Talisay City unya sa ipahigayong Sinulog sa Lalawigan karong tuiga.
Kini maoy gipaambit ni City Budget Officer Edgar Mabunay kinsa lakip sa komitiba nga nagdumala sa mga kabatan-onan nga mosayaw.
Iyang gipasabot nga ang cacao maoy himuon nga tableya o lokal nga tsokolate ug gani ang tableya mao man ang gidalit ni Presidente Rodrigo Duterte ngadto sa mga asawa sa mga lider sa nasud nga ASEAN.
Ilahang ibida ang cacao tungod kay sila usab sa Talisay ang adunay daghang tanom nga cacao ilabi na niadtong unang katuigan.
Matud ni Mabunay nga ang siyudad aduna gihapon kini plantasyon sa cacao diha sa Barangay Campo 4 nga usa sa mga bukirang barangay sa dakbayan sa Talisay.
Sa naandan, ang sikwate nga gama gikan sa cacao lamian kaayo kining ipares sa budbud nga pilit o puto maya.
Matud pa ni Mabunay nga katulo usab nga mag-ilis ang mga bata aron ilaha pa gyud nga mapasabot ang produktong cacao sa katawhan sa ilang pasundayag diin makita ang gikan sa pagtanom, pag-harvest ug selebrasyon.
Sa miaging tuig, ang Talisay nakasalmot sa Sinulog Grand Parade human nakadaog sa Sinulog sa Kabataan sa Lalawigan.
Dugang ni Mabunay nga biblical o religious ang kaniadto nila nga tema nga naa sa Joyful Mystery.
Ang dakbayan sa Talisay nigahin og P6.7 milyones nga pundo sa pagsalmot nila sa maong kalihukan niining tuiga. (BANAT NEWS)