Bagang aso gikabalak-an

CEBU, Philippines — Nagrekorida ang mga tinugyanan sa panglawas sa dakbayan sa Sugbo aron pagsiguro nga walay naapektahan sa mga residenteng nagpuyo palibot sa Ayala Business Park diin nahitabo ang sunog sa usa ka dakong mall.

Kini samtang gipaninguha sa Bureau of Fire Protection-7 ug sa Cebu City Disaster Risk Reduction Management Office (CCDRRMO) nga mapawong ang kalayo sud sa tulo ka adlaw.

Mag face mask

Ang siyudad wala lang nitutok sa fire scene apan lakip sa ilang gihatagan og pagtagad mao ang epekto sa sunog diha sa palibot niini. Gani nagpagawas man og advisory ang hepe sa CCDRRMO Nagiel Bañacia nga kadtong mga nagpuyo duol sa Cebu Business Park partikular na kadtong maigo sa aso nga gihulagway ni Bañacia maka-cancer gihangyo nga kon pwede mo-evacuate lang una ilabi na kadtong mga hubakon ug dunay problema sa baga.

Ang Cebu City Health Office nagrekorida ug nanghatag og facemask sa mga tawo ug giablihan sa siyudad ang mga health centers sa Barangay Kamputhaw, Lahug, Hipodromo, Bo. Luz ug Mabolo nga duol sa Cebu Business Park.

“Ang tuyo nato ani, aron kadtong mga kaigsuonan nato nga dunay mga problema kana bang medical emergencies pananglitan sa hubak maglisod sila og ginhawa tungod sa aso moadto sila sa atong mga health centers,” sigon ni Bañacia.

Si Dr. Alicemarie Aycardo, Assistant City Health Officer maoy gitahasan niini ug nagsuroy sa mga health centers.

Samtang gihatagan og kagawasan sa CDRRMO ang mga silingang patigayon sa nasunogan kon mangabli sila o dili.

Kadtong magkinahanglan og tabang o kaha dunay mga emerhensiya mahimong motawag sa hotline number sa CCDRRMO 0947-178-0000 ug 0947-178-9999 tungod kay mo-deploy dayon og ambulansiya aron makatubag sa emerhensiya.

Naglisod

Samtang si Rolando Orbeta, assistant Regional Director for Fire Operation miingon nga gusto nilang mapawong na dayon ang sunog ug dili molanat og usa ka semana sama sa nahitabo kaniadto sa Gaisano South Mall nga diin nilanat og hapit usa ka semana ayha pa napawong.

Gipasalig hinuon ni Orbeta nga dili na makakatap pa ang kalayo ilabi na sa katupad nga mall. Sumala pa niya nga ang pagkasirado kaayo sa building maoy usa sa rason nganong paspas kaayo ang pagkasunog.

Apan siya miangkon nga naglisod gyud sila tungod sa “zero visibility” ug grabeng kainit sa sud mao nga gipabuslotan ang mga kongkretong bungbong niini aron makahungaw ang kainit ug aso.

Giingon nga ang pagguba sa bungbong ug paglangkat sa atop niini makapadali sa pagpatay sa kalayo kay mapasiritan man kini og tubig.

Laing nasinati nga problema mao ang kakuwang og self-contained breathing apparatus nga kinahanglan aron sila makasugakod pagginhawa bisan sa kabaga sa aso.

Wala hinuon sila maproblema sa tubig tungod kay gi-divert sa MCWD (Metropolitan Cebu Water District) ang pressure sa mga linya niini padung sa direksyon sa Ayala.

Task force bravo

Alas-10:51 sa gabii, giisa ni Chief Inspector Noel Nelson Ababon, bag-ong Fire Marshal sa Dakbayan sa Sugbo ngadto sa Task Force Alpha ang alarma hinungdan sa pagresponde sa mga bombero gikan sa mga silingang siyudad ug kalungsoran ug mga fire volunteer brigades.

Kagahapon sa alas-8:45 giisa ngadto sa Task Force Bravo  ni Orbeta ang alarma.

Si Bañacia mitug-an usab sa mga tigbalita nga ilang gipaningkamotang dili maabot sa basement ang kalayo tungod kay atoa didto ang hardware section nga diin adunay mga baligyang flammable ug combustible products sama sa mga pintal.

Base sa inisyal nga imbestigasyon nila ni Senior Fire Officer 1 Ariel Balajadia, ug Fire Officer 3 Renato Borres ang Duty Investigator, atol sa ilang pakighinabi ni Rodulfo Sarza, assigned supervisor sa toys department ang sunog gituohan nagsugod sa ikatulo nga andana sa maong establisamento.

Matud pa nga nakakita kini og siga nga adunay bagang itom nga aso gikan sa Air-Conditioned Duct ug suway niya kining gipatay gamit ang tulo ka fire extinguishers apan wala na nakaya.

Matud ni Borres, ang pamahayag ni Sarza gidasonan sa duha ka mga saksi nga pulos salesclerks sa maong establisamento.

Apan hangtud ning pagsuwat wala pay opisyal nga pamahayag kon unsa gyuy sinugdanan sa maong sunog.

Apan sumala pa ni Orbeta imbitaron nila ang mga empleyadong nadestino sa maong bodega aron magpangutana. Mohimo pa sila og imbestigasyon kabahin sa mga alegasyon nga wala mogana ang fire alarm, sprinklers ug uban pa.

Samtang ang City Director sa Cebu City Police Office Senior Superintendent Joel Doria mipakatap og mga polis aron pagbantay sa seguridad.

Pamahayag

CEBU, Philippines — Ang Metro Retail Group Inc. nga maoy nag-operate sa Metro Ayala nga nasunog mipasalig nga nakig-alayon sila sa mga hingtungdang ahensya aron mapadali kini pagpawong.

Matud pa niini sa gipagawas nga official statement , ang Metro Ayala ug Ayala Center Cebu Emergency Brigade Teams nitabang sa BFP ug ubang emergency response teams sa operasyon.

Midugang usab sila nga luwas nga nakagawas ang tanang kustomer ug mga personnel niini ug wala pa usab silay nadawat nga impormasyon nga adunay nakalas o seryosong naangol.

“The management of Metro Retail Stores Group Inc. would like to thank everyone, the firefighters, the volunteers, the government personnel, its employees, concerned citizens, and all those who have helped and assisted in putting off the fire. Thank you for your patience and hoping for your understanding,” matud pa sa ilang pamahayag. (BANAT NEWS)