CEBU, Philippines — Gipaambit kagahapon sa buntag ang estorya sa pagkabata ni John Ronli Calizar ngadto sa dili mominus 50 ka bata sa Poblacion, Dakbayan sa Talisay atol sa pagsaulog sa unang anak niini nga si Zion sa ikatulo ka tuig niya nga sumad sa adlaw’ng natawhan.
Si Calizar, anak sa kanhi reporter sa The Freeman ug karon information officer sa Philippine Information Agency-7 nga si Ferliza Contratista, kinsa gipatay ni Jessie Largo tungod sa giingong selos.
Usa ka mubo nga estorya sa kinabuhi sa pagkabata ang gipaambit ni Contratista ngadto sa mga bata kung unsay epekto sa ilegal nga drugas ngadto sa usa ka pamilya. Human sa pagpaambit ni Contratista og estorya sa kabataan, gitudlo usab niini ang sakto nga hygiene pinaagi sa pagpanghatag og toothbrush lakip na ang pagpakaon ngadto sa kabataan.
Panghinaut ni Contratista nga molihok na ang kapolisan sa Dakbayan sa Talisay sa pagsikop sa laing kauban ni Largo nga wala pa nailhi ilabi na aduna nay warrant of arrest nga luwatan sa korte human nakita niini nga adunay probable cause ang maong kaso nga gipasaka. Panghinaut sab ni Contratista nga ipatuman ang maximum tolerance sa pagsikop sa suspek ug buhion kini kay sayud siya nga aduna kini daghang kasayuran nga nahibaw-an ug maayo nga masayran kung kinsa pa ang mga kunsabo niini.
Nanghatag sab si Contratista ngadto sa kabataan og leaflets diin adunay mga numero sa mahimo nilang matawgan sa higayon nga adunay mga naulipon sa drugas sa ilang barangay aron dili na moabot sa higayon nga aduna pay mga inosente nga maamong tungod sa resulta sa drugas. (BANAT NEWS)