DILG mimando sa mayor sa Dumanjug pagkanaog sa pwesto

CEBU, Philippines — Gimanduan na sa Department of Interior and Local Government si Dumanjug Mayor Efren Guntrano Gica sa pagbakante na sa iyang buhatan nunot sa kamanduan sa Ombudsman sa pagtangtang kaniya sa serbisyo.

Si DILG-7 Director Rene Burdeos niadtong Disyembre 20, 2017 niisyu og memorandum ngadto kang Gica sa pagpatuman sa Hulyo 27, 2017 nga desisyon sa Ombudsman diin gidid-an na siya sa paghupot og pwesto sa gobiyerno.

Sa samang petsa nimando sab si Burdeos kang DILG-Cebu Provincial Director Jerome Gonzales sa pag-serve ngadto kang Gica sa kamanduan sulod sa lima ka adlaw sa pagkadawat niini.

Disyembre 21, 2017 nadawat sa buhatan ni Gonzales ang memorandum apan hangtud kagahapon nasayran sa Banat News nga wala pa na-serve ang dismissal order.

Matud ni Gonzales nga nakig-alayon siya kang Gica kinsa suspendido sa pagkakaron sa laing kaso kauban sa iyang igsuon nga si Konsehal Erwin Gica.

Si Burdeos niluwat sab og tagsatagsa nga memorandum ngadto nilang acting Mayor Rainero Asentista ug acting Vice Mayor Cesar Baricuatro sa pag-asumer na sa tagsatagsa nila ka buhatan isip mayor ug bise mayor.

Ang amahan ni Gica nga si Atty. Edgar Gica una na nga nipahibawo nga moduso sila og petition to review sa desisyon sa Ombudsman ug aron mapugngan ang pagpatuman sa kamanduan. Ang kaso gipasaka sa kaatbang sa politika ni Gica nga si kanhi mayor Nelson Gamaliel Garcia kinsa nipasangil nga giusab ni Gica ang presyo sa resibo sa ilang gikaon gikan sa P11,435 ngadto na sa P21,435 atol sa seminar sa Association of Local Budget Officers (ALBO) kuyog sa mga barangay kapitan niadtong 2014. (BANAT NEWS)