CHED ug PCOO moduaw sa state universities

CEBU, Philippines — Ang Presidential Communications Operations Office (PCOO) nakigtinabangay sa Commission on Higher Education (CHED) aron matagaan og pagtagad ang kakuwangan sa koneksiyon sa mga kabatan-onan karong panahon sa digital era.

Atol sa gipahigayong special meeting kagahapon sa buntag diha sa Kapitolyo si Assistant Secretary Atty. Ana Marie Rafael-Banaag, Engr. Ronaldo Liveta, CHED IV OIC director uban ang pipila ka CHED officers ug pipila ka mga local information officers sa siyudad ug probinsiya sa Sugbo.

Matud ni Banaag nga dili ikalimod ang kadako sa impluwensiya sa mga kabataan ang teknolohiya ug social media karong mga panahona. Kini human nabutyag nga ang kabatan-onan aktibo kaayo sa social media.

Busa ang buhatan ni Banaag nakigtambayayong sa CHED aron mas mapadako pa ang ilang maabtan sa pagpadayag sa ilang mga proyekto hilabi na kadtong may kalambigitan sa edukasyon.

Ubos sa maong proyekto mao ang pagbisita sa buhatan sa PCOO kauban ang mga pipila ka opisyales sa CHED ngadto sa nagkalain-laing mga state universities sa tibuok nasud aron personal nga makahinabi ang mga estudyante ug aron madungog usab ang ilang mga reklamo ug mga pangutana.

Ang CHED mitataw nga tumong niining proyekto mao ang pagtabang sa mga naglisud sa panginabuhian ug maglisud sa pagtungha nga mga estudyante. (BANAT NEWS)