Kaso vs kanhi CSBT manager gibasura

CEBU, Philippines — Gibasura sa Municipal Trial Court in Cities ang kasong kriminal batok sa kanhi manager sa Cebu South Bus Terminal sa giingong pagbinastos niini ngadto sa usa ka stall owner.

Si MTCC Branch 7 Judge Francisco Seville niluwat sa desisyon nga gipetsahan og Septiyembre 28, 2017 nga nagbasura sa kaso base sa demurer to evidence nga giduso sa akusado nga si Vicente Dejoras Jr.

Si Piskal Fatima Asjali-Maadil ang nisang-at sa kasong acts of lasciviousness batok ni Dejoras ug nirekomendar sa piyansa nga P12,000.

Ang babayeng reklamante nipasangil nga si Dejoras nanawag kaniya sa cellphone alas 6 sa gabii niadtong Agosto 8, 2013 ug gipaadto sa opisina aron ma-renew ang iyang kontrata sa stall ug didto giingong gihagkan siya ni Dejoras ug gigakos.

Gihimakak ni Dejoras ang pasangil ug niingon nga wala siyay numero sa cellphone sa babaye ug gani matag palit niya og pagkaon sa tindahan sa reklamante, kini ang mohagad nga mohatud sa iyang opisina. Bugtong ang affidavit lang sa reklamante ang gipresentar nga ebidensiya sa prosekusiyon hinungdan nga wala nakombinsi ang korte niini nga niresulta sa pagkabasura sa kaso. (BANAT NEWS)

Show comments