CEBU, Philippines — Gihimakak sa pangulo sa Provincial Disaster Risk Reduction and Management Office (PDRRMO) ang mga pasangil ug isyu nga gibato batok niya karon.
Si Baltazar Tribunalo Jr. nagkanayon nga wala siyay gihimong daotan samtang siya nangulo sa PDRRMO ug officer-in-charge sa Provincial Environment and Natural Resources (PENRO).
“Nagtoo ko hangtod karon tarong ko nga tawo,” matud niya sa iyang pagtubag sa mga pasangil ug alegasyon batok kaniya.
Pipila sa mga alegasyon batok kang Tribunalo mao nga siya nagpatrabaho og job order sa Kapitolyo ngadto sa iyang Cacao farm sa lungsod sa Tuburan.
“Dili na tinood, nganong magpatrabaho man ta og JO?” depensa ni Tribunalo. Laing akusasyon batok kaniya mao nga siya nangomisyon sa speedboat nga gipalit sa Kapitolyo, butang nga iya usab gihimakak. Si Tribunalo giingong midawat usab kini og flat screen TV gikan sa nag-operate og sand and gravel quarrying sa probinsya ug matod pa nasayop pa og deliver nga bisa’g adto unta sa iyang balay didto na-deliver sa iyang buhatan sa Kapitolyo. “Sus Ginoo ko, wala intawon, sa balay? Wala gyud tawon,” panghimakak pa niya.
Matud niya nga adunay mga modonar nga mga kompaniya subay sa gitawag nga “corporate social responsibility” apan atoa kini gidala sa mga buhatan sa Kapitolyo.
“Naa sa hospital, naa sa PDRRMO gigamit na karon, sa PENRO ug sa hospital sa Balamban,”sumala ni Tribunalo.
Dugang niya nga tanan gihatag ngadto kanila adunay acknowledgement receipt ug gipahibalo ngadto kang Gobernador Hilario Davide III. Si Tribunalo miawhag usab ngadto sa mga namasangil kaniya nga andam siyang makig-estorya kanila. (BANAT NEWS)