CEBU, Philippines — Gipaubos sa surprise drug test sa Cebu City Office for Substance Abuse Prevention (COSAP) ang 115 ka mga empleyado ingon man opisyales sa Barangay Mabolo kagahapon.
Sigon sa pangulo sa COSAP Garry Lao, gihimo nila ang maong drug test subay na sab sa hangyo ni Kapitan Rey Ompoc.
Nasayran sukad niadtong buwan sa Pebrero ning tuiga ang Barangay Mabolo mao na ika-16 nga barangay nga napahigayunan og drug test sa COSAP diin ang uban gilangkuban sa Pardo, Malubog, Bonbon, Talamban, Banilad, Kinasang-an, Tejero, Kasambagan, Kamputhaw, Taptap, Pamutan, Hipodromo, Labangon, Ermita ug Punta Princesa.
Malipayong gipahibawo ni Lao nga negatibo tanan ang mga empleyado ug opisyal sa drug test.
“We are very happy sa result sa drug test nila kay at least nakasabot sila nga atoang punto mao nga kinahanglan kita mismo we should set an example to the constituents we are serving nga dili man ta makapanghingusog sa kampanya sa droga kung mismo sulod sa atong panimalay adunay maggamitan,” sigon ni Lao.
Gipasabot ni Lao tungod kay maglisod pa man sa pagdeklarar og drug free barangay mao nga ang ilang gitinguha nga dunay drug -free work place.
Sa kinatibuk-an moabot na 1,092 ka mga empleyado sa Cebu City Hall ang napa-ubos sa drug test sa COSAP diin gikan kini sa mga nagkalain-laing Departmento sa City Hall sama sa CCENRO, CHAC, CHAO, Public Library, Tourism Office, DepEd, DPS, City Assessors, DSWS, Operation Second Chance, City Market, PROBE, CCTO, GSO ug Mayor’s Office. (BANAT NEWS)