CEBU, Philippines — Usa ka babaye ang napalgang patay dili layo sa ilang panimay sa Camella Homes, Barangay Linao, Dakbayan sa Talisay kagahapon sa alas 10 sa buntag.
Ang biktima nailhan sa pangan nga si May Albasin, 33, nagpuyo sa maong lugar.
Matud pa ni PO3 Jason Del Campo sa Talisay City Police Station, usa ka Vergio Samboang, 44, nagpuyo sa maong lugar ang nitug-an nga usa ka puti nga sakyanan ang nilabay sa maong biktima.
Apan wala kini nakuhang plaka kay “For Registration” pa ang plate number niini sa maong awto.
Sa inisyal nga paghiling sa mga sakop sa Talisay Rescue Emergency Action Team (TREAT) nakita nga dunay samad sa walang paa ug tuo nga bukton ug tiyan.Wala pa matino kun aduna pa ba kini laing samad nga nakaingon sa iyang kamatayon.
Naabtan pa og duha ka oras una pa nailhan ang biktima tungod kay nag-ubo man kini.
Si Nelda Demiar, silingan sa biktima niingon nga caretaker sa lotohan ang biktima ug naa lang sa 10 ngadto sa 20 metros ang balay niini gikan sa lugar diin kini gilabay. Asoy pa niya nga bag-o lang daw namuyo sa lugar ang biktima.
Laing molupyo sa lugar nga si Jose Baldodo nibutyag nga makabantay kini pirme nga adunay moanha nga tawo sa panimalay sa biktima nga magsakay og “Ecosports” nga sakyanan apan walay plate number siyang nakita.
Ang kapolisan nanghipos karon og mga footages sa mga CCTV cameras sa mga balay diha palibot sa nahitaboan aron pagsubay kun kinsa ang tag-iya sa maong sakyanan nga gituohan nilang makatabang sa imbestigasyon.
Ang inahan sa biktima mao nay niila sa iyang anak ug kini mibutyag nga adunay uyab ang iyang anak apan gibuwagan kini sa anak tungod kay ang lalaki manapat man. Gani gikiha na man kini sa biktima.
Sa pagkakaron wala pay matumbok ang kapolisan nga motibo ug kun kinsa ang mamumuno sa biktima, apan si Del Campo miingon nga apil sa ilang subayon ang impormasyong gihatag sa inahan sa namatay. (BANAT NEWS)