CEBU, Philippines — Dakong hagit karon sa mga tigbalita dili lang sa Sugbo kondili sa tibuok kalibotan kining pagkatap niining mga fake news ilabi na sa social media.
Kagahapong adlawa gihimo ang “Journalism and Blogging in the age of Fake News” forum nga gipasiugdahan sa The Philippine Star, The Freeman ug Banat News isip kabahin sa mga kalihokan sa Cebu Press Freedom Week.
Sila si Anadel Camille Diola, editor-in-chief sa PhilStar.com, Jon Joaquin, editorial director sa Mindanation ug Ethelbert Ouano, professor sa College of Law sa University of San Jose Recoletos (USJ-R) ug legal counsel sa Cebu Bloggers Society ang mga pinasidunggang mamumulong kagahapon.
Ang mga tinun-an sa mass media communication ug journalism sa Cebu Normal University, University of the Visayas, University of the Philippines, University of San Carlos, USJ-R ug mga sakop sa media ang mitambong kagahapon sa forum.
Si Diola nagkanayon nga kinahanglang palig-onon ang institution sa media aron makuha ang pagsalig sa publiko pinaagi sa paghatag og saktong kasayoran ngadto sa publiko kay kining mga sayop nga balita sa lehitimong media outlets maoy nakapawala sa pagsalig sa mga tawo.
Samtang si Joaquin miingon nga dili lang sa “trolls” apan lakip sa mga reliable media sources ang nagpakatap niining fake news pinaagi og sayop nga konteksto sa estorya o balita.
Gidasig ni Joaquin ang mga kabataang nagtungha nga gustong mahimong tigbalita nga ipatigbabaw gyud ang disiplina ug saktong interpretasyon aron makahatag sila og saktong impormasyon ngadto sa katawhan.
Samtang si Ouano sa iyang bahin nakapasalamat nga adunay gihimo ang mga social media sites aron pagtangtang niining mga fake news pinaagi sa pag-ban sa mga accounts sa nagpakatap niini.
Gibutyag usab niya nga adunay giduso nga balaudnon si Senador Joel Villanueva nga mao ang Senate Bill No. 1492 kon “An Act Penalizing the Malicious Distribution of False News and Other Related Violations.”
Pasilotan sa maong balaudnon kadtong magpakatap og false news o fake news nga moresulta sa kalisang, pagkabahin-bahin, kasamok, bayolente ug kalagot ingon man ang magpakatap og propaganda nga makadaot og reputasyon sa ubang tawo.
Apan nabalaka si Ouano kay basin hasta ang mga lehitimong balita mapagan kun mahingpit kining balaod.
Si Ouano miingon dali kaayo nga mokatap ang fake news tungod kay dunay mga sites nga nakakwarta niini ug lisod subayon kun kinsa ang responsable aron makiha. (BANAT NEWS)