Tinudlo sa mayor sa Danao gikwestiyon
CEBU, Philippines – Gidid-an sa Commission on Audit si Danao City Mayor Ramon “Nito” Durano III sa pagtudlo sa usa ka konsehal nga mangulo sa City Disaster Risk Reduction and Management Office, ug consultant sa legislative affairs.
Matud sa COA nga ang pagtudlo kang Konsehal Roland Reyes isip CDRRM Officer-designate nasupak kini sa lagda sa “separation of powers” tungod kay ang Local DRRM Officer ubos man sa buhatan sa mayor.
Ang pagkuha kang Anne Valerie Martel isip consultant for legislative affairs ang wala gihapon masubay sa maong lagda sanglit alang kini sa bise mayor nga maoy pangulo sa konseho sa siyudad.
Hinoon si Bise Mayor Thomas Mark “Mix” Durano anak ra sab ni Mayor Nito.
Apan gitumbok sa COA ang hukom sa Korte Suprema sa kasong Atienza vs. Villarosa diin ang bise gobernador ang giila nga may gahum nga mopirma sa mga transaksiyon sama sa pagpamalit og mga butang sa Sangguniang Panlalawigan.
Lakip sa gitumbok sa COA ang pamahayag ni kanhi Senador Aquilino Pimentel, ang amahan sa Local Government Code of 1991, nga nagkanayon nga gituyo ang pagbuwag sa gahum sa executive ug legislative aron magtan-away sila sa usag-usa.
Hinoon ang Human Resource Management Office sa Danao morekomendar ngadto sa mayor nga mokuha na sila og permanente nga CDRRMO.
Girekomendar sab sa COA nga ang gahum sa pagtudlo sa maong consultant ihatag ngadto sa bise mayor. (BANAT NEWS)
- Latest
