CEBU, Philippines - Patay ang usa ka mekaniko samtang samdan ang laing lalaki sa pagpamusil sa managlahing barangay sa Lungsod sa Minglanilla kagahapon.
Alas 12 sa tungang gabii giulo pagpusil sa wala mailhing mamumuno ang lalaking nag-ayo og motorsiklo sa Barangay Linao-Lipata.
Ang biktima nailhan nga si Jerome Cañedo, hingkod ug molupyo sa maong lugar.
Base sa kuha sa CCTV camera, usa ka lalaki nga armado nga wala makita ang panagway ang kalit nipusil sa biktima tumong sa ulo samtang laing lalaki ang nitiwas sa biktima.
Wala na katingog ang kaubang mekaniko dihang nakita niya ang pagpamusil.
Si Supt. Dexter Calacar, hepe sa kapolisan sa Minglanilla, niingon nga adunay pagdumot ang mga mamumuno sa biktima gumikan sa ilang paagi sa pagpatay. Matud niya nga walay kontra ang biktima apan tataw nga tiggamitan og ilegal nga drugas.
Usa ka oras ang nilabay, gipusil sab si Alvin Badayos nga taga Lungsod sa Alegria sa wala hiilhi nga mamumuno sa Ward 1, Poblacion, Minglanilla.
Naigo sa abaga ang biktima hinungdan sa iyang pagkadangat sa tambalanan.
Matud ni SPO4 Geronimo Anor nga posibleng personal nga panagbangi ang motibo sa krimen gumikan kay aduna’y gikulata ang biktima uban sa iyang mga higala sa dapit.
Gituohang nibawos ang gikulata apan wala madakpi gumikan sa pagsutoy palayo sa lugar human sa pagpamusil. (BANAT NEWS)