CEBU, Philippines - Duha ka mga tawo ang gipamusil sa managlahing dapit sa Dakbayan sa Sugbo ug sa Lapu-Lapu City, usa niini gipatay tungod lang sa komedya.
Kagahapon sa hapon, gipusil patay sa gwardiya ang kaubang trabahador sa usa ka tindahan diha sa S. Osmeña Boulevard, eskina Ma. Cristina Street, Barangay Capitol Site ning Dakbayan sa Sugbo.
Ang nakalas mao si Mamerto Relacion, mensahero sa usa ka tindahan sa lugar samtang ang suspek mao si Michael Manatad, security guard sa tindahan nga gitrabahoan sa biktima.
Matud pa ni Police Officer Winston Ybañez, investigator sa Cebu City Police Office Homicide Section, padulong pabalik ang biktima sa trabahoan sa dihang kalit kini nga gipusil sa suspek patumong sa dughan.
Sumala pa ni Ybañez nisibat dayon ang suspek apan pagkahapon gikatahong nitahan kini.
Dugang pa ni Ybañez, base sa kasayuran nga ilang nakaylap giingong kusog manungog ang biktima ngadto sa suspek.
Samtang usa ka lalaki ang gipusil patay diha sa New Sangi Road, Sitio Humay-Humay, Barangay Pajo, Dakbayan sa Lapu-Lapu Huwebes sa hapon.
Si Senior Police Officer 1 Luisito Ernie sa Homicide Section sa Lapu-Lapu City Police Office (LLCPO) miila sa biktima nga mao si Pinto Tambilawan Calil, 40, taga Sitio Eba, Barangay Basak sa maong dakbayan. Nagsakay sa iyang motor padung na pauli dihang dunay mi-overtake nga motorsiklo nga giluwanan sa duha ka wala mailhing lalaki nga pulos nagsul-ob og closed-type helmets.
Ang backrider mipaulan og bala sa biktima hinungdan sa pagkalamba niini sa dalan samtang mipabulhot dayon palayo ang mga mamumuno. Nakuha sa crime scene ang 23 ka mga basiyo sa bala ug pito ka mga deformed slugs gikan sa wala pa matinong armas. Padayon pa ang kapolisan pagtino sa motibo sa maong pagpatay. (BANAT NEWS)