CEBU, Philippines - Duha ka barangay officials sa lungsod sa Asturias ang gidakop tungod sa paghupot og dili lisensyadong mga armas. Ang gidakop mao si Manguiao Barangay Kapitan Mario Delfin Tundag, 53, ug Sta. Rita Barangay Kagawad Camilo Amamag-id Dacaldacal ,45.
Ang kapolisan nagdala og search warrant nga pinirmahan ni Judge Jacinto Fajardo sa Regional Trial Court Branch 66 sa Dakbayan sa Talisay batok sa duha.
Matud pa sa kapolisan, nakuhaan si Dacaldacal og usa ka medium nga pakete sa shabu, usa ka Ingram 9mm submachine pistol; samtang si Tundag nakuhaan og usa ka KG-9 submachine pistol, duha ka .9mm long magazines niini ug 24 ka mga bala.
Matud pa sa hepe sa Provincial Public Safety Company (PPSC) nga si Police Supt. Mario Baquiran ang mga armas sa kapitan nakuha gikan sa sulod mismo sa ambulansya sa barangay. Sumala pa niya, pirmeng mogawas ang pangalan sa duha matag aduna silay masikop nga drug personalities ug giingong konektado ang duha sa mi-surrender nga si Franz Sabalones. Apan gipanghimakak kining tanan sa duha.
Samtang ang Cebu Provincial Anti-drug Abuse Office (CPADAO) mikompirmar nga ang maong duha ka barangay apektado gyud sa ilegal nga drugas.
Matud ni Ivy Durano-Meca ang pangulo sa CPADAO nga ang barangay Sta. Rita gikonsiderar kini nga “slightly affected” tungod kay aduna kini 35 ka mga drug users. Samtang ang barangay Manguiao “moderately affected” kini tungod kay aduna kini 57 ka users ug usa ang drug pusher. Hinoon aktibo ang mga Barangay Anti-drug Abuse Council (BADAC) niini apan wala pa naglihok batok sa drugas. (BANAT NEWS)