Di pangan ni Greco sa warrant
Nasuta dihang gikuhaan og mug shot nga dili diay pangan sa dinakpan nga si Leodegreco “Greco” Sanchez ang nabutang sa search warrant. — Camille L. Pateres
CEBU, Philippines - Nireklamo ang dinakpan nga si Leodegreco “Greco” Sanchez nga dili iyang pangalan ang naa sa search warrant nga gigamit sa pagronda sa mga sakop sa Provincial Intelligence Branch sa ilang panimaye sa Barangay San Juan, Tuburan niadtong Sabado.
Si Greco anak ni anhing bise gobernador Gregorio Sanchez Jr. gidakop pinasikad sa search warrant nga pinirmahan ni Judge Jacinto G. Fajardo sa Talisay City Regional Trial Court Branch 66 ug nakuhaan og usa ka kalibre .45 pistol American classic II Colt, magazine nga adunay mga bala, usa ka Airsoft rifle ug mga drug paraphernalia.
Dunay nakuha nga mga replica sa mga high-powered nga armas sama sa M16 armalite rifle, MP5, M60, kalibre .45 pistol ug .9mm pistol nga pulos dunay mga magazine.
Matud pa sa dinakpan nga wala niya nabasa og tarung ang search warrant ug uwahi na dihang nabasa niya kini nga dili iyang pangalan ang nakabutang kun dili Gregorio Zarate Sanchez III.
Sumala pa ni Greco nga dihang gironda ang iyang panimalay nagduha-duha pa ang polis nga nibasa sa search warrant kung unsa gyud ang iyang tinuod nga pangan.
“Dili gyud to ako ang naa sa search warrant. Lahi gyud to nga tao kay di man to akoa nga ngan,” matud ni Greco.
Dihang gikuhaan siya og mug shot, ang gibutang nga pangalan mao ang Gregorio Zarate Sanchez III ug gibutangan lang kini og alyas Leodegreco Padilla Sanchez.
Apan depensa sa deputy chief sa PIB nga si Police Senior Inspector Nazarino Emia nga dili kini makaapekto sa kaso tungod kay sa dihang ni-apply sila og search warrant sa korte, dunay sketch sa ilang balay ug hulagway ni Greco nga nagpamatuod nga siya gyud ang tumong sa maong warrant.
Sakto sab ang lugar sa search warrant ug nakuha ang mga gipangita nga pusil sa maong warrant.
Matud ni Emia nga ang prosecutor na ang magtimbang-timbang kung ilegal ba o dili ang gibuhat nga pagsuhid sa panimalay sa dinakpan apan kampante ra sila nga modaug sa kaso batok sa dinakpan. (BANAT NEWS)
- Latest
