CEBU, Philippines - Patay ang duha ka lalaki human gipusil sa managlahing higayon sa Labangon, Dakbayan sa Sugbo ug Lungsod sa Minglanilla niadtong Sabado.
Gipusil patay samtang namasahero ang 33-anyos nga jeepney driver nga si Gregorio Navaro Baya, Jr. sa wala mailhing mamumuno nga nagsakay og motorsiklo sa dalan Katipunan, Labangon niadtong Sabado sa kadlawon.
Matud sa imbestigador sa Cebu City Police Office-Homicide Section nga si SPO1 Alberto Diamante nga dunay duha ka babaye nga nipara sa jeep dapit sa usa ka bakeshop.
Apan giingong wala nakasakay ang maong mga pasahero tungod kay dali nga giduol sa riding in tandem ang biktima. Matud ni Diamante nga maayong tawo ang biktima maong dili pa sila makatino sa motibo sa krimen. Samtang sa Poblacion, Ward 4, Lungsod sa Minglanilla gipusil ang 44-anyos sa tulo ka wala pa mailhing mga tawo.
Sa inisyal nga imbestigasyon nasuta nga ang biktima nga si Ramon Zamora Espina alyas Kimpang nakadungog og kasikas sa iyang kusina hinungdan nga iya kining giadto aron tan-awon kung kinsa ang nagtikaw-tikaw. Apan sa dihang giablihan niini ang pultahan, dunay tulo ka lalaki ug kalit lang kini nga gipusil lima ka higayon sa iyang tiyan ug liog.
Dali siyang gidala sa Minglanilla District Hospital apan gideklarar kining dead on arrival.
Matud sa hepe sa kapolisan sa Minglanilla nga si Police Chief Inspector Dexter Calacar nga usa sa ilang gitutokan nga anggulo mao ang kalabutan sa drugas tungod kay usa ka drug surrenderer ang biktima.
“Sa among nadunggan gikan sa mga nakaila niya kay mogamit kuno na sa una unya di maayo mobayad kuno,” matud sa hepe. (BANAT NEWS)