Bantay Dagat angay himoong plantilla position

CEBU, Philippines - Ang hepe sa Cebu Provincial Anti-Illegal Fishing Task Force (CPAIFTF) mibutyag nga usa sa ilang problema mao nga ang mga bantay dagat o fish warden sa kalungsuran mapapha kini sa katungdanan kon ang nagtudlo kanila wala na maglingkod sa pwesto.

Matud ni Lyndon Ruiz, pangulo sa CPAIFTF nga kasagaran sa mga bantay dagat, mga “political appointee” lang ug dili mga plantilla position ug kon mapapha sa katungdanan ang kasamtangang fish warden uban sa nag-appoint kaniya, mag-training na usab sila sa mohulip niini.

Sa maong sitwasyon, gawas nga mag-adjust ang bag-ong ipuli, maggahin na usab og laing budget ang gobiyerno alang sa pagbansay na usab sa bag-ong fish wardens.

Si Ruiz nanghinaot nga mahimong plantilla position ang mga bantay dagat sa kalungsuran aron usab ang mga proyekto ug operasyon batok sa mga ilegal nga panagat dili maputol.

Dugang niya nga sa milabay’ng tuig ug niadtong buwan sa Pebrero, 100 na ka bantay dagat sa kalungsuran sa amihanan ang napaubos nila sa training nga gipahigayon sa Lungsod sa  Bantayan ug Medellin. Ang amihanan bahin sa Lalawigan sa Sugbo, naila kini nga fishing ground.  

Matud usab ni Ruiz nga nakig-coordinate sila sa PNP-Maritime, Provincial Environment and Natural Resources Office (PENRO), Bureau of Fisheries and Aquatic Resources (BFAR) ug uban pang ahensiya nga maoy mag-training sa mga bantay dagat. Giingong lakip sa training mao ang kabahin sa mga balaod sa pagsikop sa mga ilegalista.

Subay niini, ang Provincial Agriculture Office (PAO) nagplano usab sa pagpaubos og training sa mga bantay dagat.

Si Dr. Roldan Saragena sa PAO mibutyag nga ang probinsiya migahin og P10 milyones nga budget niining tuiga alang sa training ug incentive sa mga bantay dagat.

Ang mga fish warden nga mapaubos sa training magdawat na unya og P2 mil nga incentive matag buwan.

Nasayran nga kadtong mga lungsod nga daku og shoreline, lima ka bantay dagat ang pilion ug kadtong gamay tulo lang ka bantay dagat.

Dugang niini, gibutyag ni Ruiz nga ang iyang buhatan ug ang PAO nag-coordinate na sa maong plano. (BANAT NEWS)