Tabang gikinahanglan sa Sirao
Ang naguba nga karsada ug mga balay nga natabunan sa yuta samtang dunay uban ang nangaguba gyud tungod sa pagdahili sa yuta ang makita nga hulagway sa Sitio Langub, Sirao, bukirang barangay sa Dakbayan sa Sugbo nunot sa sagunson nga pag uwan-uwan. — Aldo Nelbert Banaynal
CEBU, Philippines - Nanawagan og hinabang pinansiyal sa kagamhanan sa Siyudad sa Sugbo ang mga residente sa Sitio Langub, Barangay Sirao nga apektado sa landslide.
Ang Sirao usa lang sa mga barangay sa siyudad nga apektado sa landslide kay ang yuta sa maong lugar, subay sa pamahayag sa Mines and Geosciences Bureau (MGB), dunay tension cracks.
Tungod sa landslide, lima ka pamilya ang naapektuhan kinsa boluntaryo nga nibiya sa ilang pinuy-an kay nakita nila ang karisgo sa sitwasyon.
Kagahapon ang pangulo sa Cebu City Disaster Risk Reduction and Management Office, Nagiel Bañacia, subling nibisita sa mga lugar sa Sirao nga apektado sa landslide.
Dunay bahin sa Sitio Langub nga ang dalan nangliki, delikado na agian sa mga motorista ug dunay dapit nga ang dalan natabunan na sa yuta nga gipaubos sa clearing operation aron maagian og balik.
Gawas niini, nakita sab ang kadaot nga nahatag sa pagdahili sa yuta human dunay mga balay nga natumba.
Usa sa apektado sa hitabo si Vitalana Mabano, 71, kapin sa 40 ka tuig na nagpuyo sa dapit.
Nihulagway kini nga lisud ang ilang kahimtang tungod kay panahon sa kagabhion dili sila matulog sa ilang panimalay kay madungog nila ang pagdahunog sa yuta ug nabalaka usab sila sa ilang kaluwasan.
Matud niya nga ang siyudad dunay gitanyag nga relocation site apan giingong magbayad sila og P500 matag buwan, butang nga gikagul-an nila kay alang nila bug-at ang maong kantidad sanglit apektado usab ang ilang panginabuhian.
Hangyo nila sa kagamhanan nga dili sila mobungat kung pila ang ilang gusto kay ang ila nga duna silay tabang nga madawat o kaha kabalhinan diin luwas sila ilabi na sa kalisud sa ilang kahimtang karon.
Si Bañacia sa iyang bahin niingon nga tungod kay dili man kalikayan ang mga katalagman ug daghan ang naapektuhan, ang siyudad motagana og pundo alang sa mga biktima sa landslide.
Dugang niya nga kung ang siyudad dunay standby funds, ang mga molupyo mobalhin sa mga dapit nga delikado sanglit duna man sila’y pundo nga magamit aron makatukod sa ilang panimalay.
Dili pa hinoon makasulti ang disaster team kung pila ang mahatag sa siyudad tungod kay makig-alayon pa sab sila sa ubang departamento nga motabang sa mga residente.
Ang CCDRRMO morekomendar sab sa paghimo og laing dalan gikan sa Sitio Langub paingon sa Barangay Pulangbato kay napanglantawan nga ang maong lugar dili na maagian tungod kay nagsige og lihok ang yuta. (BANAT NEWS)
- Latest
