CEBU, Philippines - Ang Provincial Environment and Natural Resources Office (PENRO) gikatakdang mopahigayon og kaugalingong evaluation kabahin sa danyos sa pagkalunod sa barkong LCT Marc Jason III sa kadagatan sa Lungsod sa Malabuyoc.
Ang hepe sa PENRO, Baltazar Tribunalo, nikuwestiyon sa assessment sa kompaniya nga wala mo-coordinate kanila ug sa Bureau of Fisheries and Aquatic Resources (BFAR).
Subay niini, si Rommel Kirit, senior environmental specialist, nipasabot nga ang oil nga nanglutaw nga niabot ngadto sa kadagatan sa Lungsod sa Alegria dili “oil spill” apan “oil sheen” nga matud pa niya mga oil kini nga nitapot sa pisi ug sawog sa barko.
Matud ni Kirit nga ang oil sheen nipis kini nga layer sa oil nga mabanlas lang usab dayon o mo-evaporate ug “minimal” lang ang epekto niini gawas kung lapad kaayo ang natabonan niini diin nagkinahanglan na gyud og intervention aron kini makuha.
Giingong base sa assessment sa kompaniya sa barko walay danyos sa mga gasang sa lugar diin nalunod ang barko.
Gipasabot ni Kirit nga ang gilantaw sa kompaniya sa ilang assessment mao lang ang direkta nga danyos sa coral reefs ug wala gilantaw ang “indirect” sama sa polusyon.
Giingong dunay mga tuyom ang nangamatay.
Dugang ni Kirit nga dili pasabot nga walay danyos ang coral reef wala nay tulubagon ang kompaniya maong kinahanglan nga susihon gyud kini tungod kay manubag sila sa polusyon nga namugna. (BANAT NEWS)