Mga katabang irehistro

CEBU, Philippines - Niawhag ang Provincial Board sa hugtanong pagpatuman sa Republic Act 10361 kon ang “Batas Kasambahay” o “Domestic Workers Act” ilabi na ang mandatory registration sa mga katabang alang sa domestic workers o master list.

Si Bokal Raul Bacaltos nagkanayon nga daghang barangay sa probinsiya ang napakyas sa pag-implementar sa required registration.

Si Bacaltos nagkanayon nga ang Department of Interior and Local Government (DILG) niadtong Enero 18, 2013 niluwat og memorandum nga nagmando sa pagrehistro sa mga katabang.

Ubos sa nahisgutang balaud, ang mga opisyal sa kabarangayan mo-require sa matag employer sa pagrehistro sa mga katabang ubos sa Kasambahay master list.

Ang kapitan sa barangay pinaagi sa executive order magbutang og Kasambahay desk officer kinsa maoy modumala sa Kasambahay Desk.

Ubos sa nahisgutang balaud, ang mga employer dili pwedeng mo-hire og bata nga nagpanuigon sa 15-anyos paubos.

Ang mga katabang makadawat kini og P2,000 nga minimum nga sweldo matag buwan alang sa mga siyudad ug 1st class nga lungsod samtang P1,500 sa ubang lungsod. (BANAT NEWS)