Sikoy-Sikoy sa San Fernando

CEBU, Philippines - Misamot kasadya ang kapistahan sa Lungsod sa San Fernando karong tuiga gumikan sa ilang malampuson nga Sikoy-Sikoy Festival niadtong Sabado.

Ikatulo nga higayon na kining pagpahigayon sa Sikoy-Sikoy Festival nga gisugdan niadtong tuig 2008 apan naundang unom ka tuig na ang nakalabay gumikan sa pag-ilis og mga opisyal sa lungsod. 

Ang sikoy-sikoy gikan sa termino nga "panikoy" usa ka pamaagi sa pangisda diin ang kasagaran nga makuhang isda mao ang barungoy ug laniw diin ang San Fernando abunda niining mga isda.

Ang paghimo sa maong festival nagsimbolo sa kamadasigon sa mga taga San Fernando diin ilang gihulagway nga ang mga balud mao ang mga pagsulay ug ang mga isda nga makuha nagsimbolo sa grasya.

Matud ni Edsel Laguda, Vice Chairman sa Sikoy-Sikoy Festival nga usa kini ka paagi aron mahiusa ang San Fernando ug mahilayo sa mga bisyo ug sayop nga binuhatan ang  kabataan.

Ang ritual showdown gipahigayon sa San Fernando Central Elementary School diin pito ka barangay ang nagtigi.

Midaug ang Brgy. Panadtaran sa panagtiging ritwal diin aduna kini cash prize nga P50 mil. Samtang ang Brgy. Greenhills nga maoy second placer sa ritual showdown maoy nilangkat sa best in street dancing.

Sa Festival Queen, midaug ang 18-anyos nga contestant sa Brgy. North Poblacion nga si Mariella Linea Enad.

Iyang gipadayag nga wala siya magdahum nga siya’y mapili sanglit lig-on ang iyang mga kontra.

Ang iyang pagsayaw iyang gihalad ngadto sa ilang patron nga si San Isidro Labrador. (Darlene A. Teves ug Zeny L. Tapuyao, CNU Interns/DILT) gibalik na og sayaw (BANAT NEWS)