Emit naglaum nga paboran sa mga kapartido
CEBU, Philippines - Desisyonan na sa konseho sa Dakbayan sa Talisay ang petisyon nga giduso sa Federation of Talisay City Urban Dwellers Association (FETCUDA) nga ilang palangkatan sa komitiba sa urban poor si Konsehal Doroteo Emit kay wala na sila’y salig niini.
Unang mipadayag si Bise Mayor Alan Bucao nga magdepende na kini sa iyang mga kauban sa konseho kun magpabilin ba si Konsehal Emit sa iyang komitiba o langkatan gyud siya. Apan si Emit mipadayag nga masaligon siya nga mopabor kaniya ang desisyon kay nituman man siya sa iyang trabaho ug gawas pa ka partido niya ang mayor ingon man ang konseho.
Hinuon si Emit nagkanayon nga kun dili man gani pabor kaniya ang desisyon, giingong mohangyo gyud siya nga suportahan siya ug pasabton siya kun nganong langkatan siya og komitiba.
Siya naglaum nga unta mga merito lang sa petisyon ang tukion ug dili mopasulabi sa pamolitika ang pagdesisyon sa iyang mga kaubanan.
Asoy pa niya nga bisan unsa man ang mogawas nga desisyon, dili kini rason nga moundang siya og tabang sa urban poor.
Nasayran, si Emit misuporta sa laing grupo sa urban poor nga gihinay-hinay na og tukod nga aduna say bendisyon ni Mayor Eduardo Gullas. Natukod ang maong grupo human siya gipetisyonan sa FETCUDA. (BANAT NEWS)
- Latest
