CEBU, Philippines - Giawhag sa Cebu Provincial Anti-Drug Abuse Office (CPADAO) ang Department of Education nga ipaubos na sa drug test ang mga magtutudlo.
Nakita sa CPADAO nga angay na nga ipaubos sa drug test ang mga magtutudlo ilabi na nga hapit na ang pagbalik sa pagbukas sa klase.
Gimando sab sa Civil Service Commission ang mandatory drug test sa mga empleyado sa gobiyerno.
Matud sa pangulo sa CPADAO, Carmen Remedios Durano Meca, nga base sa memorandum circular sa CSC niadtong Marso karong tuiga, ang mga empleyado nga dili mopaubos sa drug test mamahimong matangtang sa serbisyo.
Si Meca nagkanayon nga ang iyang buhatan wala pa nakadawat og request gikan sa DepEd alang sa pagpahigayon sa drug test.
Nadawat lang niya nga suwat mao ang pagpahibawo sa DepEd nga ang maong ahensya nakamugna na og komitiba alang sa mga magtutudlo nga magpositibo sa drug test.
Gitataw ni Meca nga ang ilang buhatan dili makapangunay og pahigayon sa drug test ug mag-agad ra sila sa request sa mga ahensiya. (BANAT NEWS)