CEBU, Philippines - Patay ang usa ka lalaki human gitabangan og kulata sa iyang gikalalis sulod sa buwangan sa may Sitio Sangi, Barangay Madridejos, lungsod sa Alegria.
Ang nakalas mao si Jake Abarquez, 42, residente sa Barangay Guadalupe Carcar.
Samtang ang mga suspetsado mao sila si Garry Lendio, 38, ug Paul Teves Sr., 43, pulos mga residente sa maong lugar.
Matud pa ni Police Officer 3 Wilt Almagro, Desk Officer sa Alegria Police Station, usa ka concerned citizen ang nitawag sa ilang buhatan nga adunay tawong gitabangan og kulata duol sa buwangan sa maong dapit.
Sumala pa ni Almagro, base sa imbestigasyon, naglalis ang biktima ug mga suspetsado sulod sa buwangan nga gidudahang may kalambigitan sa pusta.
Tungod sa kagubot gipagawas ni Jestony Apostol ang mga nag-away ug gipatagaan kini sa tag-iya og tag P100 aron manguli ug paglikay nga modako ang kagubot.
Apan didto sa gawas sa buwangan, gikatahong gisundan sa mga suspetsado ang biktima ug gitabangan kini og kulata hangtod kini nawagtangan og panimuot ug natumba.
Dali pa unta kining gidala sa tambalanan apan gideklarar kini sa mga doktor nga patay na. Ang mga suspek nasikop ra hinuon atol sa follow up operation ug nagtingkagol na karon sa lock-up jail ug pasakaan og kasong murder. (BANAT NEWS)