CEBU, Philippines – Traysikad driver ang iyang amahan, ug maoy nag-atiman kanilang managsuon ang iyang inahan. Malisud ang ilang kinabuhi sa probinsya, diin wala sila’y sugang dagitabnon ug nagsalig lamang sa lamparilya isip iwag sa iyang pagtuon kada kadlawon. Apan ang kawad-on, wala makababag kang Marielle V. Rubio, 20-anyos nga taga Casay Dalaguete, aron mutapos isip Summa Cum Laude sa kursong BEED-General Content niining bag-o lamang, gikan sa Southwestern University PHINMA .
Kamaguwangang anak sa upat ka magsuon sa magtiayong Ronald ug May Rubio si Marielle. Una silang nanimuyo kaniadto sa dakbayan sa Mandaue diin nanginabuhi isip masyador sa buwangan ang iyang amahan. Apan dihang Grade 5 na siya, nibalhin sila og puyo sa Dalaguete, human usab nanirado ang tindahan sa iyang apohan. Gikan sa P200 nga kinitaan sa iyang amahan isip masyador, nisamot kini og kagamay pag-abot na nila sa probinsya sanglit nihit man ang mamuwang didto. Nisamot sab kalisud ang ilang pagpuyo diin nasinati nila nga ganas lang ang ilang gikaon tibuok adlaw. Gikinahanglan usab nilang tungaon ang ilang nilung-ag nga kan-on aron aduna pa sila’y mahungit sa panihapon. Dili lalim ang ilang kinabuhi sa probinsya. Kinahanglan pa nilang mutadlas sa kasikbit nga sitio aron magsag-ob og tubig gamit ang traysikad sa iyang papa.
“Kung naay tun-anan, paunahon na lang nako og himo sa ilang projects ang akong mga manghod,”saysay niya sa Banat Tingusbawan.
Wala sila’y cellphone ug relo sa probinsya, busa ang dawn rosary matag-adlaw maoy ilang gihimong orasan aron mubangon na sila diin magtuon siya ug manikaysikay ang iyang mga ginikanan. Bisan pa man niini, nitapos si Marielle isip First Honorable Mention sa Casay Elementary School.
Nipadayon sa high school si Marielle sa Casay National High School inabagan sa scholarship gikan sa ilang munisipyo diin magdawatan siya og P300 matag buwan. Dako na kaayo ang maong kantidad alang kaniya kaniadto ug usahay kun makadawat na niya ang maong tabang ihurot nila kini og palit og bugas. May mga higayon usab nga mamaylo sila og bugas sa silingan aron adunay malung-ag. Apan dili kini babag sa kalampusan ni Marielle sa iyang pag-eskwela. Nigradwar siya isip 1st honorable mention sa high school ug nakadawat og Jejomar Binay Leadership award. Siya usab ang presidente sa Supreme Student Government kon SSG ug editor-in-chief sa ilahang school publication. Human niini, nihukom siya nga dinhi sa dakbayan ipadayon ang iyang pagtuon bisan pa man sa pinansyal nga kakulian sa iyang pamilya sanglit kumbinsido siya nga mas mahayag ang iyang kaugmaon sa siyudad.
“Daghan moingon namo nga mga silingan nganong magpasiyudad gyud ko bisan nga naglisud,” hinumdom pa niya.Daghan siya og giadto nga tunghaan apan sa nahisgutang tunghaan gyud siya nipasilong sa hingpit gumikan kay nahatagan siya og 100% scholarship grant. Hinuon magbayad siya og miscellaneous ug bug-at gihapon kini alang sa iyang pamilya. Mas naningkamot si Marielle nga makakuha og average nga 1.0-1.2 kapin sa iyang unang semester sa tunghaan aron makaangkon sa labing taas nga scholarship grant diin wala na gyud siya’y bayran nga miscellaneous. Tuod man gibuligan gyud siya sa Ginoo ug nakaabot ang iyahang grado.
Niadtong second year na siya nitipon siya og puyo sa iyang iyaan sa Naga aron malibre ang iyang kaon. Apan maglisud siya sa iyang pamilite busa nakahukom siya nga mamaligya og pagkaon sa tunghaan sama sa puto cheese ug empanada. Ang iyang iyaan maoy tag-iya sa iyang mga baligya diin iya lang patungan og piso ang presyo ug dinhi niya kuhaon ang iyang pamilite.
“Dako kaayo ko’g bag, lisod kaayo kay magbarog na biya ka sa bus kay Naga na biya ko mosakay niya daghan kaayo ka og bitbiton nga plastic,usahay dili na nako madala akong libro,”saysay pa niya.
Nakasabot ra sab hinuon ang iyang mga kaila, diin iyang maestro kaniadto muhatag niya og 10 minutos aron makapamaligya siya sa dili pa sila magsugod og klase. Pag-abot niya sa ikatulong ang-ang sa kolehiyo nitrabaho siya isip personal student assistant sa usa ka maestra diin pagahatagan siya og kwarta. Nag-tutorial sab siya diin aduna siya’y P3,000 matag buwan nga madawat hinungdan nga nakaabang siya og lawak duol ra sab sa SWU. Nakatrabaho sab siya sa usa ka ESL company atol sa summer. “Thankful kaayo ko kay daghan ko’g classmates mo-offer og pahuwam, tampo-tampohan nila, pero bayran nako sila igkadawat nako’s sweldo,”niya pa.
Makaguol
Giisip ni Marielle nga labing dakong hagit alang kaniya sa kolehiyo mao ang panahon nga gibaligya nila ang ilahang traysikad para lang makapamlite siya padung dinhi sa syudad gikan sa Dalaguete. Niuli siya niadtong panahona sa Dalaguete kay mangayo og kwarta sa iyang ginikanan para sa mga projects. Apan sa pagsiri-siri sa iyang ginikanan wala gyuy’ nagpahuwam nila og kwarta maong napugos sila og baligya sa ilang traysikad sa kantidad lang nga P1,500.
“Kun huna-hunaon kay ligid ra gyud na nga presyo,”pahungaw niya.“Nakakita ko sa akong mama nga nihilak, paghatag sa kwarta.”
Laing dakong hagit nga nitakboy sa ilang pamilya mao kadtong higayon nga nahiagom og nervous breakdown ang iyang amahan tungod sa pagkadisgrasya sa iyahang manghod human nabanggaan og sakyanan.
“Magdagan-dagan siya sa kalsada, murag natala-tala.Dili man gud mokaon siya sa sige’g bantay sa akong manghod.
Niuli siya kay siya ra man ang paminawon sa iyahang amahan hinungdan nga tulo siya ka adlaw nga absent sa klase ug wala siya nakakuha sa midterm exams. Nihangyo siya sa iyang mga maestro ug palaran nga nakakuha og pasulit. “Grabe kaayo ang paagi sa Ginoo, gipaagi niya sa lain-laing mga tawo.Gihatagan gyud ko niya’g paagi bisan pa unsa kalisod, basta bilib lang gyud ka sa imong kaugalingon ug salig ka Niya, mahitabo gyud imong gusto,” makahuluganon niyang mga pulong. “Everything you do kay i-offer nimo Niya. Bisan pa unsa imong naabot, i-acknowledge nimo Siya pirme,”dugang pa niya. Nigradwar siya sa kolehiyo isip Suma Cum Laude apan naglisud siya pagtuo niini gumikan sa iyang mga absences kaniadto sa nasakit pa iyahang amahan. Pagkahibalo niya sa maong balita atol sa graduation rehearsal, “Dili ko kasabot, mura ko’g dili kadungog.”
Kun kaniadto wala ganahi si Marielle sa iyang kurso, karon nausab na ang iyang pagbati niini. “Kun teacher man gud ka, dili man lang ka mag-teach para lang sa knowledge, as a teacher dapat maka-inspire ka nila,” pasabot niya.
Busa tambag niya ngadto sa mga kabatan-onan ug mga estudyante nga kinahanglan mapaubsanon ka kanunay ug mapasalamaton ngadto sa mga tawo nga gikuhaan nimo og kusog ilabi na gayud ngadto sa Kahitas-an.
“Daghan lang gyud ka og kalisud pero depende nimo unsaon nimo pagdala. Do not be proud, be humble and acknowledge His presence. Always be thankful sa mga tawo nga wala nituo nimo, ug sa mga nituo nimo ug sa nagpatuo nga kaya nimo.” Panapos pa niya, “Keep believing, trust Him.” (BANAT NEWS)