Palayo sa poste kun magtabanog

CEBU, Philippines - Subling  mipa-himangno ang Visayan Electric Company, Inc. (VECO) sa mga kabataan ug ginikanan sa pagdili sa pagpalupad og mga tabanog duol sa VECO power lines ilabi na karon sa panahon sa ting-init.

Matud ni Engr. Mark Anthony Kindica, AVP for Engineering Operations sa VECO nga lingaw ang pagpalupad sa tabanog sa ingon niining panahon apan iyang giklaro nga sila wala magpugong niini apan ila lang ipahimangno ang risgo sa pagpalupad sa tabanog duol sa mga power line.

Sumala ni Kindica, ang pagpalupad sa mga tabanog duol sa linya sa kuryente dako og kahigayonan nga maoy hinungdan nga adunay makuryentihan ug makamugna og power interruptions ilabi na kun maigo kini sa overhead wires.

Ang Reputation Enhancement Manager sa VECO nga si Quennie Bronce nibutyag nga niadtong tuig 2016 ang VECO Distribution Services Department nakatala og 140 ka power interruptions sa mga nagkadaiyang franchise area tungod sa tabanog nga miigo sa power lines.

Dugang ni Bronce, ang pagpalupad sa tabanog kinahanglan buhaton sa dakong hawanan ug layo sa overhead power lines, substations ug ubang electrical installations.

Lain nilang pahimangno nga dili mokatkat o mokuha sa mga tabanog nga nasabod sa overhead power lines ug dili mosuway pagsulod sa substation. Mahimo hinoon silang tawgan sa ilang hotline 230-8326 o kaha mopadangat og mensahe sa ilang Facebook page aron sila na ang magpadala og crew. (BANAT NEWS)