Kadaugan sa Mactan gidagsaan

CEBU, Philippines - Liboan ang nisaksi sa tinuig nga pasundayag sa Kadaugan sa Mactan sa Mactan Shrine sa Dakbayan sa Lapu-Lapu kagahapon.

Ang pasundayag gibitoonan sa mga artista sama nilang James Ryan Cesena isip Magellan, Tony Labrusca isip Datu Lapu-Lapu ug Kris Bernal isip asawa sa lider sa Isla sa Mactan.

Bisan sa hulga sa teroristang grupo sa Abu Sayyaf sa Bohol, ang kapolisan nihulagway nga malinawon ang kasaulogan.

Nakadugang sa kadaghan sa mga nanan-aw mao ang pagdeklarar ni Presidente Rodrigo Duterte nga walay trabaho sa Dakbayan sa Lapu-Lapu kagahapong adlawa, Abril 27.

Matud ni Mayor Paz Radaza nga mismo si Duterte niila kang Lapu-Lapu nga nasudnong bayani. Gibuksan ang Kadaugan sa Mactan sa alas 7 sa buntag pinaagi sa Santos nga Misa ug alas 9:30 a.m. hingpit nga gisugdan ang re-enactment. (BANAT NEWS)