CEBU, Philippines - Lig-on pa gihapon ang walo ka dump trucks ug usa ka prime mover sa kagamhanan sa Siyudad sa Sugbo nga napalit niadto pang 1995.
Ang mga Hino brand nga mga sakyanan nga hinimo sa Japan napalit niadto pang unang termino ni Mayor Tomas Osmeña.
Matud sa hepe sa General Services Office, Ronald Malacora, nga sa walo ka dump trucks, duha niini ang na-rehab diin lakip usab sa ilang giayo mao ang prime mover ug nasayran nga nagamit na kini sa maintenance sa kadalanan sa mga bukirang barangay sa siyudad.
Nagkanayon usab kini nga ang mga driver ug mekaniko sa siyudad mas mopili sa branded nga sakyanan kay gawas nga ang piyesa niini mapalit ra sa nasud, mas lig-on ug kasaligan ang dagan niini itandi sa mga napalit sa administrasyon ni kanhi mayor Michael Rama nga gikan sa China.
Gihulagway hinoon ni Malacora nga itandi ang branded kaysa gikan sa China, mas mahal hinoon.
Ang kanhi administrasyon nakapalit og dili mominus 40 ka trucks gikan sa China.
Tungod kay duna pay gipang-rehab nga mga trucks, dili una morekomendar ang GSO nga mopalit og mga bag-o. (BANAT NEWS)