CEBU, Philippines - Gibutyag sa pangulo sa General Services Office, Ronald Malacora, nga nalangay ang pag-renew sa lisensiya sa mga armas nga giisyu sa siyudad ngadto sa kapolisan ug mga opisyal sa Dakbayan sa Sugbo.
Matud pa nga ang mga dokumento nga naduso sa Firearms and Explosives Division sa Camp Crame gibag-o na.
Lakip sa mga gipangayo mao ang Juridical License to Own and Possess a Firearm hinungdan nga nibalik na sab og renew ang GSO sa mga rekisitos lakip na kang Mayor Tomas Osmeña kay silang duha ang moduso niini isip head agency ug custodian.
Kapin sa 200 ka armas ang wala pay lisensiya diin mao kini ang mga armas sa huwes, barangay officials, department heads ug kapolisan nga gipa-recall sa siyudad.
Si Konsehal Joel Garganera, chairman sa Cebu City Police Advisory Council (CPAC), nikwestiyon kung nganong wala pa gihapon nabalik sa kapolisan ang mga armas nga gipa-recall.
Nagtuo hinoon si Malacora nga dili makaapekto sa serbisyo sa kapolisan kay duna man sila’y mga armas nga giisyu sa ilang organisayon.
Dugang niya nga bisan og duna nay lisensiya ang mga armas, magdepende gihapon kini sa desisyon sa mayor kung ihatag og balik o dili. (BANAT NEWS)