Bunga sa Siomai Bai

CEBU, Philippines – Bisan asa ka molingi sa kadalanan, aduna kay makita nga mga kan-anan nga namaligya og nagkadaiyang putahe. Adunay nagbarbecue, inasal ingon man siomai.

Gani naila man ang Barangay Tisa sa Dakbayan sa Sugbo isip “The Siomai Capital of Cebu” kay anaa sa maong lugar nagtapok ang daghang tindahan nga nagtanyag og siomai.

Apan adunay brand sa siomai sa Cebu nga nagpalahi, kay gawas nga wala kini motapok sa Tisa, lahi sab siya sa uban kay gipatungan kini og pinikas nga itlog ug kun aduna man gani pareha, siguradong dili matupngan sa uban ang timpla niini.

Ang nahisgutang siomai, mao ang siomai nga nagbase sa Barangay Basak San Nicolas, ang Siomai Bai sa pamilyang Villaces.

“Ingon ana man gyud na’ng magsugod og negosyo, mokusog, mohinay, mokusog na sab”, matud pa ni Mary Grace ang kamagwangang anak sa pamilya nga mao na karon ang gisangunan sa negosyo nga nagsugod niadtong tuig 2007. Gihulagway ni Grace nga bisan tuod og milanat na og 10 ka tuig ang ilang negosyo nga maoy nakatabang sa pagpalampos nila sa pagtungha sa iyang mga igsuon, adunay kapait nga ilang natagamtam una pa nila natilawan ang katam-is nga bunga niini.

Gradwado sa kursong Business Administration si Grace sa University of Cebu ug kasamtangang nagsabak sa iyang ikaduhang anak. Nagtrabaho siya karon sa usa ka pribadong kompaniya samtang nag-manage usab sa negosyo sa ilang pamilya.

“Niabot to ang time nga adunay issue nga naa kunoy drugs ang among siopao. But na-prove namo nga dili to gikan sa amo,” butyag pa ni Grace human iyang giangkon nga gawas sa siomai namuhat usab sila og siopao diin gumikan sa maong isyu, nakahig ang ilang kinatibuk-ang negosyo. Gani adunay uban nga misunod sa istilo sa ilang siomai.

Matud ni Grace nga ang ilang mga customer mismo maoy mitabang kanila pagpamatuod nga dili tinuod ang maong isyu ug suway lang silang gidautan sa ilang mga kakompetinsiya dihang inanay nga nailado ang ilang produkto ug daghan ang nakauyon niini.   

Asoy pa niya nga sukad nga nagsugod sila paghimo og siomai hangtud karon, bisan paman og mitaas ang presyo sa mga sagol niini, ilang gipaningkamutan nga magpabilin ang kalidad kay kini mao ang sekreto kun nganong nagpabilin ang ilang mga suki.

“Pure pork gyud na ang among siomai, wala gyud na sagoli og unsa diha kay makabantay gyud ang mga customer.”

Gawas sa de kalidad nga produkto, gi-ubanan sab nila kini og kalidad nga serbisyo. Gani kun mo-order ka’g minimum, free na ang delivery niini kun anaa lang palibot sa siyudad ang lokasyon sa hatdan.

Mapasigarbuhon usab si Grace kun nganong namentinar nila ang kalidad sa ilang produkto kay mano-mano kini hinungdan nga nakahatag sab sila og trabaho ngadto sa ilang mga kaparyentihan. 

Diin matud niya nga ang paghatag og bili sa pamilya maoy usa sa ilang mga sekreto kun nganong milahutay ang ilang negosyo kay sila nagtinabangay aron kini molambo.

Matag kwaresma, mao ang panahon nga mohinay ang ilang negosyo gumikan kay baboy ang main ingredient sa siomai apan sa ubang panahon ilabi nga adunay mga okasyon sama sa pasko, mokusog gyud ang ilang produksyon niini.

Ang igsuon ni Grace nga usa sa ka polis, bag-ohay lang miabli og kaugalingong branch sa Brgy. Cogon-Ramos aron kini na maoy motabang og suplay sa dili nila maato nga orders gikan sa ubang bahin sa Sugbo ingon man ngadto sa kaislahan ug kasikbit nga mga probinsiya sama sa Negros ug Bohol.

Naglaraw na sab karon ang iyang igsuong maestra nga magbukas og laing branch sa Dakbayan sa Bogo aron usab ma-akomodar ang nagkadaghan nilang customers sa amihanang bahin sa lalawigan.

Bisan sa mao unyang pag branch-out sa Siomai Bai, ilang gipasalig sa ilang mga suki nga magpabilin ang kalidad sa ilang produkto sanglit silang tulo ka magsuon ang nasayod sa sekretong timpla nga mugna sa ilang amahan nga si Faustino “Along” Villaces.

Nasayran nga tres mil ngadto sa kwatro mil ka buok nga siomai ang ilang mabaligya kada adlaw samtang dos mil ngadto sa tres mil ka siopao ang ilang ma-dispose sab.

“Priority namo ang standard quality”, paambit ni Grace sa Banat News Tingusbawan.

Aron makadungan sa trend sa modernong panahon, inanay na usab nilang gihimo karon ang online marketing ug mahimo na sab maka-order online ang ilang mga customer. Ang branch nila sa Ramos mao ang nag-una-una niini matud pa ni Grace.

Gikan sa negosyo sa siomai, nakabaton na usab sila karon og mga unit sa taxi nga maoy nagpamatuod sa grasya nga ilang nadawat gikan sa siomai. Aduna na usab sila’y bag-ong balay sa Labangon.

Taliwala sa maong kalampusan, sa pagkakaron dili nila mahimong biyaan o ibalhin ang karaan nilang himoanan og siomai sa Basak-San Nicolas kay dinhi nagsugod ang ilang paningkamot ug ang dapit nga saksi sa tanan nilang kapakyasan ug kalampusan. “Ang panaot natural rana… Dili dayon ma-discourage kay natural rana… Di lang gyud magpaapekto sa competition”, tambag ni Grace ngadto sa nagsugod pa lang nga mga negosyante kay kini mao ang ilang gipanaminan sa kalampusan nga ilang natagamtam karon. (BANAT NEWS)