P3M ang danyos ni Crising
CEBU, Philippines - Ang Provincial Agriculture’s Office mibutyag nga moabot ngadto sa P3 milyones ang kadaot sa mga pananom sa mga kalungsoran didto sa amihanang bahin sa Sugbo human sa bagyong Crising sa miaging semana.
Ang pangulo sa Provincial Agriculture Office Roldan Saragena miawhag sa mga local government units nga moduso sa masterlist sa mga mag-uuma nga naapektohan aron sila maka-avail sa agri-fishery insurance program sa Probinsya sa Sugbo.
Kapin P800 mil ang kantidad sa kadaot sa hayopan sa mga apektadong lungsod gikan sa Dakbayan sa Danao, Borbon , Catmon, ug Sogod samtang gipaabot pa ang sa lungsod sa Carmen nga maoy labing naapektohan sa pagbaha ug may walo nga namatay.
Gawas sa food assistance adunay dugang hinabang nga ihatag ang probinsya ngadto sa pamilya sa namatyan sa pagbaha.
Matud ni Marivic Garces ang pangulo sa Provincial Social Welfare and Development Office (PSWDO) nga mohatag ang Kapitolyo og tag P10 mil nga financial assistance ngadto sa namatyan.
Sa laing bahin, nangandam na ang Cebu City Agriculture Office sa ilang mga drums ug water hoses alang sa mga mag-uuma sa kabukiran nga posibleng maigo sa huwaw sumala pa ni Arlie Gesta, Assistant City Agriculturist .
Sa pagkakaron, ang barangay Agsungot ug Sirao pa maoy miduol kanila aron mangayo og mga gamit pagpundo og tubig. Le Phyllis Antojado, ug report nila ni Pamela Pugoy ug Mary Cris Remata ug Zeny Tapuyao (BANAT NEWS)
- Latest
